Kaban lama di kenang...Selamat Taun Baru

....Kaban lama dalam kenang lebuh malik ke belakang ngiching merening utai ti udah serta nengkadah ngelengka taun taun ti udah lalu ngambat taun ti deka datai. Selamat Taun Baru nuju bala ke diau ba dini dini menua.
OOoooOOOOOoooOOhhhaaaaaaaaaaaaaaa!! Raban Kenyalang Red....
Duduk ari kiba ke kanan:Alexander Bennet(Kanowit), Suaibie Morshidi(Mukah), Ali Omar Hamid(Limbang), Nordin Ahmad(Dalat), Aki Gerubi(Undop, Kenneth Numan(Balai Ringin), Henry Usat Bit(Belaga)
Bediri ari kiba ke kanan:Yunus Braham(Mukah), Sulaiman Bujang(Miri), Abdillah Haji Yassin(Miri), Lucas Stephen Jengka(Serian), Jau Imang(Marudi), King Kawi(Mukah)Raban enda sempat datai:Phillip Pisun(Mukah), Nooruddin Liew Sze Hoon(Kuching), Julaihi Idris(Kuching), Anthony Edward Megat(Serian), Mohd. Daud(Marudi), Sazali Suip(Marudi)Paul Natu(Lundu), Nelson Sanyut(Serian), Pergis Igoh(Kuching) enggau Roland Bala(Miri) Selamat Taun Baru nuju pengajar Mr. Balang Buayeh.

Bala raban Kenyalang Blue besipatka buah uki...Duduk ari kiba ke kanan:Azeni Sahad, Bobby Dickson Forster, Apin Pauzan, Silan, enggau Christopher Ranggau.
Bediri ari kiba ke kanan:Pengajar Borhanuddin, Ahh enda ingat ka nama kaban China siku tu, Abdillah Haji Yassin, Neilson Ilan Mersat, Yunus Braham, Nordin Ahmad,Stephen Kiew, enggau Joseph.
Enda sempat datai:Ali Omar, Felix Michael, Jau Imang enggau Julaihi Idris

Aki Gerubi begulai begambar enggau raban bala pemain baruh umur 16 taun dulu kelia.

Selamat Nyambut Hari Krismas

Selamat nyambut Hari Krismas serta Selamat Taun Baru 2006 nuju kami sebilik di Kuching enggau di Simanggang.

Pesan nuju bala boss heheheheh...ngarapka kita berekat bepengerai musin Krismas tu lalu betuah belimpah mujur belama. Aba, enti bisi nyenguk nemuai ngagai Nanga Ngemah, Ngungun enggau sekayu menua Batang Rajang...kasam kasam kasam anang enda ehhh!! Anang enda ngenataika pesan aki Gerubee hehehee.


Nuju nuan menyadi tuai: Selamat nyambut Hari Krismas. Belajai ke pengawa perintah di menua urang anang enda bejimat, lebih agi baka menua Kosovo. Anang enda nelai enti mindah. Heheheh Kentucky suba enda bangat chelap bakanya neh!!!

Nuju pengajar deriba entuka: Anang manchal!!! Tinggalka pemanchal ngambika lekat ba aku aja hehehehe,,,...Selamat Taun Baru 2006.

Nuju pengajar nembiak sekula: heheheh ajar manah manah bala potential replacement nuan!!! Maya tu ngenang kaban ti bemain merindang temuai enggau lagu "wonderful tonight" di kelab malam kelia..FYI menyadi..2-way Street udah nadai agi..Bo bemain di Orlando, Bryan udah full-time electrical engineer, Walker nyadi penyukat highway, David mengkang ngetanka studio ngerakam lagu iya...Tim di Nashville. Bryan mesan selamat nyambut Hari Krismas ngagai kita sebilik lalu John pan bakanya mega.

Nuju pemancha sepital besai: Ngajihka bala raung enggau pama ke di buntas nuan idup magang!!!hehehehehe. Merry Christmas enggau Selamat Taun Baru.

Nuju tukei besai: Merry Christmas. Sigi ga untung ehhh..untung bulih beliung enda ngambuh, untung bulih ilang enda nyepuh..untung bulih bangkung enda ningkuh!

Nuju bala kaban belayan di sekayu menua Undup enggau sebarang alai kita diau: Selamat nyambut Hari Krismas enggau Taun Baru.

Minggu sebedau Krismas

Bendar magi jam kin kitu seminggu sebedau Krismas 2005 tu. Bala soldadu baru udah abis peresa semester ujung taun. Pengawa di luar enggau di rumah nyau bejumbuh baka tugung lumpung kayu kena bekindu maya musin chelap. Mensia nyau betekelut berundang kasang bebelika barang nyendiaka diri ngambat penatai 25 haribulan December. Berita dipansutka nuju sekayu dunya pan chundung, kelalu berat lebat sepiak nyaguka sida tuai pemesai pemegai menua. Enda tau bakanya laban ngerami berita enggau gula ngambika manis di bacha, ngarung pengamat pemendar idup mensia. Krismas 2005 tu jauh nyelai ari musin ti udah.

Baka ti udah, seminggu sebedau Krismas tak berandang menua laban kias acha lampu engkijap betali karan..di luar enggau di dalam sama sebaka nyau bekepelik baka bintang nerangka langit dipeda malam. Taun tu engka nyelai mimit, betempuk tempuk bisi petang bisi berandang. Ngambi ke banding, Walmart, di empu siku sebilik ke di jangka siku ari semua ke pemadu kaya di dunya, enda ngerami musin Krismas 2005 tu baka ti udah. Nadai lampu neon betali karan bechura begagai enggau pangan diri; nadai pun kayu Krismas lalu nadai Santa anak Apai Krismas ngambat penatai mensia ho..ho..ho.. Engka meh nya nelai mesan semua pemesai raja pemegai menua enggau chara enda terus terang madahka penyelai musin cuti enggau musin Krismas 2005. Rayat bukai pan ulih dikelaika mega nagang diri. Enggi kami sebilik nitihka urang, enda lebih enda kurang. Tajapan pelastik di keluarka menua Chantung, pun kayu Krismas ti putih bediri di ruai besai lalu pun kayu Krismas ke gadung galak mali ditebang bediri di ruai penama penatai temuai alai bala duduk betundi begagai pagi lemai.

Ari tenung aku, penyelai enggau kebuah bakanya engka berat nunjukka rega minyak ke jauh udah niki mai semua rega utai niki magang. Kempeni ke masang serta ngeluarka karan pan nikika rega karan, nyau betunda udi dua tiga kali tu tadi per kw. Nya meh kini nyuruh rayat nyau nagang diri serta nyendiaka diri munyi sempama kitai bansa ti munyi tu,"Nyendiaka payung enggau betudung sebedau hari ujan." Ujan endang ujan tang tusah deka ditemu maya laban mua hari mangkin sari mangkin masam baka buah maram.

Penegap Iban In Me

Ari kiba dipeda ke kanan: S.Perkin ari Turkey, Aki Gerubi ari Borneo, D. Montague ari Jamaica..ya man!! N. Chabbra ari India, R. Ivanoff ari Uruguay duduk berandau nganti pemuka UN Tea Party maya sekula kelia. Jaku enggau ngepan nandangka bansa diri. Tu meh pun urat rakat penegap Iban in me.
Wah...wahh...wahhhh..pama ga aki nyau nemu beches wes yes no! Nama nuan tak sepiking nyau meresih munyi resih dalam kali deh aki? Ketuchum ari pending sepiak ngagai pending sepiak tudah aki nyaut. "Nguji enkelung ka dilah deh uchu," saut tudah aki Gerubi. Nama mula... munyi ku bala Iban ari menua tunga ke Undup!

"Nama utai nya nyau baka larvae deh indai," munyi kenang sekeda bala betunjuk ngena tunjuk tinchin rasuk nunjukka pinggai. "Ukai ulat nya indai," sembur liur ngumbai leka igi asi ke ngidupka iya ari mit sampai nyenguk seberai menua ribai tu tadi ulat. "Ukai ulat nya deh dom, beras disumai aku nyadi asi nya dom," saut tudah indai Igat. Tak bedau sempat bejaku tudah Igat, indai iya lalu nanya baru munyi, "Nama utai ke dikumbai 'laba' nya deh dom?" Tudah Igat lalu enda engkeretik laban tekuing ati merening pinggai. "Sigi pama pemandai anak aku siku nya. Nadai anak kami serumah ngemandai iya nya," munyi sada apai iya ari tisi bekenang kediri bejaku nengali lalu nungkun insap ngenang anak diri ke udah datai ari menua ribai mai pemandai pulai nyenguk rumahpanjai. Ngenang anak diri ke udah dipasuk rasukka sir raja perupisa tuan lechera enggau ketupi pelimping besegi bulih degree biuluji ari menua Kenada menua prairie.

Hmmmm... "Nadai nanding nanding," leka serebana aki Tuan Tanah kami menua. Ngajihka diri enda ngembuan iku keru dilah meku bakanya meh tudah aki kitai Gerubi siku tu laban enda tentu nyamai mega kitai tak di ujung mulut mensia nyadi buah jaku. Ngajihka diri enda tilur nyau enda ngelala bubur maya datai nemuai bejalai mansa ruai sida bala kaban rumahpanjai. Bulan beganti bulan, taun betukar taun diau di menua urang nyau baka semut enggau gula, baka raung enggau reriga tak enda ga asai bisi berubah bejaku Iban ---->munyi Iban laban kitai sigi Iban! Iban in me..Iban in me..mengkang meruan tegap bediri. Bejaku, betundi begagai tak munyi Iban ahh laban asal kitai enda ulih dilengkaka, enda ulih dibuai. Lapa nya bula kini..enti resih bejaku urang putih baka munyi resih guring bala kaban China menua Simanggang bebali nama Sri Aman. Beseling seling meh selingking kating bala sepiking. "you all" nyau munyi "ya'll".."get it up" nyau munyi "giditdup". Bakanya meh leka munyi telai beperawai ngambika jampat datai! Teperasa mega aku ninga mensia bekesemaka bala kelia. Lapa enda nangi niti andau titi rawan maya nurun mansang belelang kelia laban ke bedau ngasai ensepi pengamai ku kitai. Salah munyi leka jaku...begulai enggau sekimo betumbakka selju agi meh jaku meruan! Iban in me..Iban in me ooooooohaaaaa mengkang meruan tegap bediri..baka tiang menira menua Malaysia dipangka ke ribut biau balai ..long lai seruran ngepai..enda tekebu enda tekesai jaku kitai.
Iban in me..jaku Iban in me..mengkang meruan berari.

"Nama utai F... Up nya deh dom," tanya Apai Igat. "Ukai pakap nya," lalu nyeling ke tepian alai bala bunsu telanjing mandi lemai!

Asai Bisi Jalai Enselit....

Ngenang serta meratika pengagit enggau pengeransing mensia, indu enggau lelaki, bemain kayu tiga enggau bemain politik ba upis. Kepuas aku dugau dugau nyau ga kempuk kerubung untak terebai ngenang jaku apaituai aku kelia ke ngempu nama Thomas. "Asai bisi jalai enselit deh kitai sanu," ku iya nelai bala lalu ditangkanka tuchum tudah tuai. Langgu jaku tudah tuai jarang rumbau, suah bebungai tu bangat enda ulih dilengkaka ari pengingat mega.
Nembuka timpuh semilan puluh hari ba kempeni tu tadi ampit ngemataka perangai enggau penumbuh ulah kitai mensia berebut ke nama enggau pangkat. Mensia bansa urang bukai pan enda bangat nyelai ari mensia bansa kitai ba pengawa tu...nama ke diri ari lubang rangka, nyelit ke diri ari lubang pisit. Tusah ngenang. Bala pan nyau rangap-rangap enda tedataika jaku laban rang nyau teganggam tekanchin laban pusin politik upis. "Nama kebuah, yada yada yada," munyi kenang bala. "Sapa urang dikelala kitai, ukai nama ditemu kitai," enda berasai pansut ari mulut aku. Pengamai enggau enda nya pulai ngagai kitai siku siku meh tudah runding ga.
Betelai bejaku belalai sigi enda tentu tau dipejalaika di upis alai kerja deh, lebih agi bejaku betenahka urang tu nya. Kebuah lumur satu laban tau nyelentik pegu nendang belakang pagila lusa dudi hari. Mensia ukai nya sebaka penebal kulit malu, enda sebaka tisik bidik burik kelabu, nadai sama tuku enggau tuju. Siku nunjukka siku, ngumbai sapa ke patut di beri nama megai pangkat tu nya. Akai daiiii nama aki pan bisi meh di selepitka mensia tu tadi. "Anang irau ka aku," pesan aku nuju sida. "Juluk ati enggau tinjau aku lebih tinggi ari nya...dua tiga serak remang dirembang baru datai...dia meh alai aku ila," munyi ditambah aku. Bala bangat rindu kempelin tu nya yada yada yada...nadai guna. Bedau maya kitai enselit meh nya. Ngelak ke urang menselit dulu meh kitai tang anang enda nyeling ke belakang enggai ke urang tak najar puchuk pemegah raja bandang, nyingkang pan anang enda bejimat jimat enggai ke tepuruk ngalit lubang, ensuruk pan anang enda bejaga jaga enggai ke di sintak tali panjuk aki ungkok tetungging lelunggang. Asai bisi jalai enselit!!!!

Belajar Nadai Milih........

Akai daii..hahahah rindu mega begagaka utai!!! Saritu endang bejumbuh utai ke deka digaga. Udah ninggalka komputa ngerituk merinsaika perugerim bukai, haha ngajar diri empu ngidupka kerita entuka lama..asssapai tusah amai laban kitai endang ukai di agihka petara nyadi injinia lekterunik tu ahhh..deka meretika sistem chas entuka belabuh ari pemasang starter, penerit tali pinggang pulley enggau alternator lalu meratika pejalai, pemansang enggau pemulai, karan ngechas entuka hmmmm nyadi makinik baruh kayu tu lagi hehehehe. Akai mati kitai enti salah sambung..tak meletup ngapa utai tau nganguska entuka! Belajar begagaka utai tu ukai nya milih umur enggau pendiau.

Bansa Kitai Mensia Kitai

Ari tuchung bukit nurun ke emperan landai
Ari ili ulu sungai sampai ke menua seberai
Bansa kitai mensia kitai
Besekula enda mega tinggal pemandai
Peluang kurang baka ke nadai
Bepangkat baruh enda bangat besai
Lumur dua lumur tiga udah chukup nyamai
Nampung kemayang dudi belama enda berasai
Bansa kitai mensia kitai......

Bansa kitai mensia kitai....
Pintar bejaku enda kurang pelandai
Taring pelanduk, pengerawang ati, bebungai serai
Pengelandik, pemintar, enggau pengering nama penadai?
Baka sibau lebat bauh rumbau bebungai!
Dipadah di tegah mali besai
Gereginsa tau gelegensai be-ila asai
Benasit nadai baka chuit nyemerang jalai
Merejuk kekejuk enda datai
Bansa kitai mensia kitai
Patah andau labuh basah nyemerai.

Bansa kitai mensia kitai.......
Agi idup agi ngelaban leka sanggai
Seleka penabur dua perawai
Nyadi terabai ngetanka menua kasih sayau ke kitai
Tu kelia menya maya Sekaut Buda Sarawak Rinja ko kitai
Di ujung mulut suah di puji sida Tuan Ribai
Diatu nama deh dikair ke tisi udah dikesai
Nadai apa nadai nama nadai pemanggai.

Bansa kitai mensia kitai.....
Angkun gila kuasa nyadi pemesai
Nguluka nembiak sida ke tuai
Landik belaya enda ulih begulai
Bepechah belah nadai pendiau tinggal tembawai
Numpang menua diri nyadi temuai
Kerauh kerawang mabu keranjai
Serebana merinsa tinggal bansa bukai.

Bansa kitai mensia kitai....
Kaya tabi basa mudah di pakai
Murah rega kupi sechangkir asi sepinggai
Dunga dunga duduk jenuh ninga bala Datuk betelai telai
Berambu menyadi bebakih emperian bula enggai
Lapa bangat bakanya deh ohh Tuan Besai
Ehhhh ka pan enda deh Gerubi Tuai
Semadi nadai...semadi nadai
Bansa kitai mensia kitai........

Iran ati.....

Penumbuh ulah kitai mensia tu endang sigi tau nyuruh kitai rangap rangap baka baya ngeradai muka nyawa ngumbai langau, tau nyuruh kitai iran ati. Nya meh, naka pemayuh mensia ke datai ari semua perasuk jalai pengidup kini.

Besari sari ngenang tu salah, nya salah, minyak niki rega, barang bukai enggau pemakai niki belipat ganda sampai dikenang dalam karang berita huhhhhh....Nya aku meratika ulah mensia begaut berebut bebelika pekakas perengka tengkira nyendiaka diri nyambut pengerami Hari Krismas 2005 tu. Akai daiiii nyau bepuruh dada tudah aku ngira hehehehe benasit ke udah mandi..enti enda pia ..akaii tusur daki ke ampit merap makap tubuh tu...Ukai bisi sekena utai ke di beli! Urang ke bejual sigi ga pengawa sida ngumpan enggau tu enggau nya ngambika ati kitai tekuing tepawing majak ngerujak enggau penemu serta runding kitai enda tau enda ngembuan ngibun utai ke dipedagangka! Murah bakani pan...siti utai ke mudah lenyau ari runding...Sapa ka rugi? Urang ke bedagang ka rugi? Ekkkk ka urang, enggai urang ekkk deh apai. Tang mereti ga aku kuing runding urang banyak tu. Nya meh pengawa aku..ngumpan ngepai mensia ngambika sida ari bukit ari langit, ari emperan ari sebayan, ari tasik ari selantik, ari serga ari neraka, ari kampung jerung menua nyumbuh bekangau ngensung nurun magang, sampal enggau aki enggau ini, sampal enggau uchu enggau ibu berebutka kengka 'laluh' ke agi tinggal. Dangggggg amazing! Hmmmm nadai alah di kenang enggau jaku.

Undup Menua Aku....

Undup menua aku..
Dibalut selimut putih remang biru
Undup menua kami...
Kampung basah diteritik embun pagi
Kulu kili endang enda bebali
Jauh dudi tinggal kediri
Tu meh gaya menua Iban ili ulu
Undup menua aku.

Penyinu, penyayau,pengasih, enggau penyayang
Ari pasar Simanggang nyentuk ke ulu Batu Lintang
Di kelingi gunung bukit Kelingkang
Tak mayuh penumbuh laun mansang
Menua repa munggu bepaya minta randang
Menua kampung endur bejit bejelangkit ngerinyik tunsang
Ahhh lapa meh nuan lubah maju
Undup menua aku.

Dipeda lama udah enda dipansa jarang
Temiang, Munggu Ruan, Entebar, Rampu Wie aku kenang
Aku malik, aku nikal besurut undang
ABC one two three munyi pengajar SRK Batu Lintang
Asai ke kemari aku angkat belelang ngejang
Esss diatu enda ka udah century dua puluh satu
Anang saru anang kaju
Besabar meh nganti meh menua aku
Undup menua aku.

Wong Padung beberita endur bala merejuk tungging
Wong Pupu agi mabu tepian bunsu telanjing
Limpang ba Klassin Simpang mansa menua Menalang
Kekiba kekanan emperan repa madang lalang
Tuai rumah, penghulu enggau pengari menua tuju betentang
Baka ke nganti ambai peransang tunang
Ari Guntung melunggang sungai antu
Ngusung menua Undup menua aku.

Ngarapka sapa bala Keling Aji
Ngemansangka menua ngempung mensia ngetanka nengeri
Oohhhaaa ya lapa belampung bepilih kita menteri
Batu bata, atap sing ukai subsidi
Di kenang mabuk nurun ngundi
Ngenang poverty... mere absurdity
What to do laban my love for you
Undup menua aku..
Siang malam dikenang selalu
Undup menua aku...

Terima Kasih.....

Terima kasih mensia
Merunsaika selapat dunya nadai entara
Mai penerang enggau reti baru dunya saiber
Keluar masuk jarang bekelala

Terima kasih Indai
Laban pechaya enggau sayauka aku
Ari mit sampai besai
Nadai indai engka aku enda menuku

Terima kasih apai
Nuan pulai aku datai
Nuan bisi aku nadai
Nyadi peransang sampaka tuai

Terima kasih aya ibu
Berat rat mesan enggau jaku
Meri lalau meri tenggau
Kasih ke aku enggaika tebasau

Terima kasih Undup
Laban muka jalai pengidup
Urat rakat getah rengah
Enda dibuai meruan kejah

Terima kasih kaban belayan
Maya labuh jatuh terengkah
Malik ke kita meh aku wai pangan
Ngeliat angkat berubah belubah lubah

Terima kasih kami sebilik
Nama meh reti pengidup aku
Enti nadai kita ngapit ari sepiak
Enti nadai kita ngansak.

Terima kasih semua.....endu Puteri enggau endu Grace(hornbill)? laban bisi ninggalka seleka dua ba pintu dunya aki gelegundik menua sakai, aki gelegandak gerubi tuai. Terima kasih mega ditujuka ngagai semua kaban belayan kitai bansa Iban ke sempat limpang meraka simpang ngerunding pampang, ayan kangau ayas rekau tusun leka serebana.

Happy Thanksgiving...manuk kuluk segala ina is in the oven!!!

Sari Sebedau "Hari Manuk Kuluk"

Turkey day nyau ulih itung enggau jarum panjai jam begantung ngelaika sikin. Tu meh hari ke dikumbai urang menua Merika tu Thanksgiving, ngepunka holidays season menua nyentuk ka Taun Baru. Sari tu meh mensia di menua ditu begulai begempuru enggau diri sebilik. Laban ke nginjau menua urang alai ngidup kediri, nyau ga ngambu sari tu hari cuti. Urang ga diau magang enggai ga bangat nyadi kitai nyau gesah gesah ngereja tanah, enda pia?

Bakatu meh pelin kami saritu enggau pagila. Saritu meh maya bepandukka utai di pakai...hmmmm kenyang aku tu lagi ..ngempat kerat nyubit mimit..Pagila baru begelumu begempuru makai begulai. Laban ke endang Iban, lain mega asai nyelat bansa bukai ehhh. Asai ulih betundi enggau bala anak, bekuntau enda lama aja bemain di luar besipak ka bul semadi nganti maya perugerim urang bemain bul dipansutka telebisin besatelait. Dunga dunga meh meda nganti moa hari petang malut remang ngelengka ke siang ngelaluka malam. Murus gumpal perut enam sapar enggi aku tu ngetatka pengenyang diri ....akai daiiii. Ngirup enggau urang ga enda, ka pen enda nuntum ai kupi chelum keretum!

Bemain Ngajar Aku......

Pengerindu kitai mensia siku siku enda sama enda sebaka. Semua kitai mensia ada ke dunya injau di berekatka petara ngembuan pengelandik enggau pemintar. Ari mit sampai ke kitai besai tuai, siku siku kitai nyeliah ngubah diri jauh nyelai ari urang bukai enggau chara guna kitai ngena pengelandik enggau pemintar ke diagihka. Ari pengawa lumba enggau main, bisi sekeda bala lempung kaki lanchat jari belanda betinju ngari ka negeri. Bisi mega bala berat burit rindu duduk meda TV..hehehehe enda ulih engketut lama bemain hockey. Ngiruhka diri bemain ball enggau main bukai mega ukai semina jalai kitai minta temu nama tampak rita, ukai semina alai kitai mantaika pengelandik tebilang nama. Pemesai reti ba diri empu laban kala ampit enggau urang bemain, lebih agi main ball, hockey, sipak raga, enggau lumba darat tu ulih aku kenang enggau rintai leka jaku. Kelia, dipeda tak nadai beguna sekali baka ke masau jam ti tau dibagi ke kerja bukai lebih agi ke pengawa pelajar. Diatu ngira diri beberekat diagihka petara ngibun pengalandik enggau urang ngeruh ai besipatka bungai rumput teka maya bemain hockey, belunjakka lupak tengah padang bemain ball.

Terima kasih buah takraw, buah hockey, buah ball. Ari ke gagit geligit nyandik nimang bala kita meh aku bepun ngelatih diri megai urang. Megai urang enggau nyerakupka mensia meh lilih kuah bemain ke pemadu besai reti ba aku siku sampai ke tuai.,,hehehehe gerubi ga agi hehhh hemmm ehhh. Nama reti dipilih nyadi tuai enti enda nemu beguna ka pengelandik enggau pemintar ngempung pemain, nyerakupka pemain, meri peransang ngagai pemain, enggau utai bukai mega, enda pia?

Dalam simpul jaku, bemain mega ngajar aku:
a. betabi basa serta meretika adat atur chara pendiau bansa urang bukai ke udah enggau begulai.
b. meretika jaku bepekit, betanding, belaban, enggau alah-menang.
c. besabar, betulak ansur serta mendingka penemu urang bukai lebih agi bala raban pemain.
d. alah-menang nyadi peransang.
e. ngenataika peneleba diri ngagai rebak ke dudi.

Rindu Rindu Meh Selalu

Puas udah aku merening
Pemajik nyuruh ati tekuing
Enda berasai mai bepangan mai betawing
Kumang bajik nadai tanding

Suba aku ngepai nuan belalai
Aku deka nuan enggai
Laban aku merinsa nadai pemandai
Ukai menantu pilih apai indai

Diatu sekali bepansa agi belala
Meda dara nganta nadai bakanya
O wai ambai lama
Lapa meh masau diri bakanya

Di tegu enda nyamai
Di purus nadai asai
Kulit ngeriut enda berupai
Diatu ambai megai gelar kumang gerubi tuai.

OOOOOoooooOOOoohaaa anang teperasa kitai meda kumang mansa bajik mua. Indai urang, bini urang, ini urang, gundik urang, anak urang, hehehehehe janda, dara, begembar dua nyau sebaka magang di dunya mansang. Akai dai bebaju nyau nyuruh nyeregu bulu, betanchut tau nyuruh lemi pala tut. Sental begumpal, sempit ngerupit ayan kulit hmmmmm ditegu enda tau dipeda nyuruh teperasa.....for our eyes only. Enti mata bisi beperut gelana apoooooo nyau kenyang ngeranyang dua tiga kali ehhhh. Hassssapai enggai ka puni negu dah aki....enda alah di pantuk tedung ular kendawang.

Rindu rindu meh selalu.

Nyabak Tuai Enda Berasai

Be taun taun bebulan enggai
Ngejang ke menua enda berasai
Pengerindu penyayau aku ke nuan ambai
Mengkang meruan enda aku buai

Ninting malam ninting hari
Nuan ayan dipeda enda bebunyi
Ka aku berap kemayang sulu ngebu pegi
Tegepang aku angkat dani
Nemunya mimpi ngasuh beraie

Nyabak tuai sinu aku ngenang
Janji manis semaia balang
Enda ulih nikal ke belakang
Laban nuan sulu udah di empu urang

Kini meh penunga aku mai diri
Ngelantangka diri merindang ati
Nyabak tuai ngenang berarie
Laban sulu udah bisi ganti


Karang kenang Aki Gerubi merindang pagi. Naka meh pemayuh utai ke tau tama mansa kerubung pala maya pagi hari, nengkilaka bulan dibalut remang ninggalka minta ganti matahari nerangka pagi.

Masau jam

Enda berasai dani pagi di gerak leka ujan ninggang perabung! Ahhh enggau neritka mata benung chundur kulit agi tendur enggau kupi sechangkir. Duduk entap narit asap nyenguk rumahdayak.com enda lama meresa nilik karang kenang anak mensia ke bisi mai reti, bisi mai ubah ba runding enggau pendiau. Baka ke keji enggai puni, tak peda diau aja. Hmmm ngechik lumor loterry ke sempat di japai lemai kemari...hasssaapai nadai ga nya ngait ...engka umpan enda manah kini!!! Nasit di empu urang laban lumor ke bulih perais tiga ratus lima belas juta udah mega di temu di jual di California! Nganti pagila lusa meh aku.

Mupuk enda lama...malas berita menyadi

Ngelala bansa ari jaku.

Ngelala buah ari langgu, ngelala bansa ari jaku. Tu meh jaku kitai ngarung tabi basa siku siku. Ari tu mega aku deka ngerembaika serta nambahka pemesai reti jaku kelulu ke suah didinga kitai besemaka pengaya enggau peninggi tabi basa kitai, bansa ke dikumbai Iban.
Di kelala buah ari langgu, dikelala bansa ari jaku. Ari mija betapak segala GerubiTuai, tu meh nyemetak agi laban dini dini kitai diau, jaku enda ulih lenyau. Ngerembaika sayap beruie ipar burung kenyalang terebai inggap ba blogspot.com ngena jaku Iban. "Ahhhh anang guai meh aki Gerubi. Nikal enda lama nuan aki." Au meh, nyurutka diri kebelakang dulu. Enti langgu di-intu enggau manah manah endang patut buah iya nyadi manah. Asai enda di tutu tungau! Ngelala langgu aku? Dikelala bansa ari jaku?!!!!? Di sangka kitai bakanya mega tang basa enggau jaku tu nyamai di gaga laban ukai utai dibeli tajapan enti dijual endang naka pemesai rega! Ngelala basa aku? Bah kini ke tuju tunga tarit runding nuan deh aki? Anang guai.....anang nyangka ari tabi basa, ari leka sada, leka sampi, leka kelala  auuu..anang teperasa.... meda langgu runding laban aku siku aku, penemu aku endang penemu aku ngena jaku Iban. Ngerembaika jaku bansa....Hassssapai sigi ga gaya menua nadai entara, selamat datai ba dunya saiber! Ngelala GerubiTuai? NOT!