Benung Ngiga Asai..

Setaun nampun di bukit, sebulan nandan di langit asai pengelama ti udah netapka diri ba menua baru agi meh kasak kasak ngiga asai, meruan enda nyamai. Perening kiba jeling kanan tak nyelai meh utai di peda. Enda nyalah nyalah baka rusa masuk kampung ko kitai tak gining gining tegenung merening. Nya meh gaya ensera cherita kitai deka mansang sesingkang merayap enda lama baru besugang.
Matau menua : Ahh nadai nama nama ko jaku kenang dalam ati ngenang menua baru….ukai nya bangat mesai ni menua Simanggang, tang enda ulih dipesemaka kitai enggau menua ulu Undop. Rintai pasar naka pemanah, jalai tak alus berasai ngenyamaika kaki laban ti enda kasar baka batu ngemesai buku batu jalai alun. Pejalai entuka pan tak beratur nitihka chara undang undang adat jalai. Mensia pan mayuh macham bansa- ari ulu ari ili rampa menua, Iban, Laut enggau China. Assss apai udah ga timpang datai ari rumah tangga tumbang..timpang kedua kali mega tudah aku laban ti enda nemu bejaku laut enggau bejaku china enggau sida bansa! One step forward two steps backward tu neh. Jaku orang putih hmmm jauh pawieee..Surut undang? Anang guai meh! Ahh nama meh menua tak di kumbai kampung neh? Kampung Resak, Kampung Ulu, Kampung Ili, Kampung Tengah!! Ngumbai menua tu kampung tak bejarit berintai bediri chegi chegi ga rumah bala mensia. Merinsa kitai datai ari menua ulu tu. Tak enda berasai mega abis menua dia dipatau, ditengah, disukat pemanjai jam digusung pejalai. Palan dikerinduka suah alai merindang ati nya panggung wayang, padang BLDC, enggau pasar Simanggang.
Pendiau aku: udah nasit..Benasitka diri diau ba Flat Polis Simangang meh tu tau ulih bekelala enggau bala anak mensia nyelai menua. Nadai ga bangat lama alai ngelala bala anak nembiak ari sepiak-sepiak. Nyau kepuas puas diri nyelitka diri nyadi nembiak dia nyau ga ngelala sida ti tuai besai apai indai orang ti udah megai pengawa benama kerja perintah. Later in life, I realized sida tu played roles mansang nyingkang nengah andau batang titi lalau pengidup. Bemain tu sigi lumur satu deh tudah aku maia nya. Nadai utai dikenggaika enti pasal bemain. Ari bemain meh aku ngelala sida tuai besai..kadang kadang di anu orang, ditundi orang, dibai orang, etc…but that’s life. Bisi kebuah meh nya.
Pengawa maya nadai sekula: Laban ti sigi rindu enggau orang nginti akai daiii abis kerapa alai nginti. Enti nadai nginti, nyau tinggi matahari sigi junuk junuk nurun nyukat pemesai pasar. Duduk sebelah panggung wayang menatka burit lapar enda berasai. Ari tu meh tudah aku ngelala bala kaling ti baru deh. Bendar nganti jam nepan lumor lima lemai alai nurun ngelaban luchak bemain bol enti nadai meda orang tuai bemain ba BLDC. Ahh bup endang sigi di selalaika aku dibaruh tilam enggau di baruh katil belama deh! Malam hari, udah mandi, enti ninga rentak entak kaki bala mensia bemain di luar…sigi engkajat aja mansang. Di kangau, dilunsin, dipusil ba pending upah iya kelalu deka bemain. ...aku endang sigi aku meh nya.