Tak nadai nanding nanding..nadai apak bala nembiak baka kerimpak tajau niang..nama meh ulih kita tu bangat kelalu ransing deka bemain?Aus enda berasai; lapar enda makai; dikepai pulai naka pengenggai! Bisi bulih perais mangkuk pirak? Tu meh tanya ti suah di pansutka urang tuai. Besembur liur betali ludah mulut basah sida ti tuai tuai laban enda tesautka diri betanyaka pengeransing bala nembiak ti balat ngelendatka padang deka bemain. Ahh ku saut kelia laban ti nadai beleman muntang kerembang ," Nadai meh bulih perais deh.. semadi rindu aja..pelir dibai mansang pelir ga di bai pulai..kadang kadang gatal laban ama rumput teka ti seruran berebut enggau tungau ti datai jegit jegit jampat ngigit," saut betundi ngelimpang. Nadai nanding nanding tak nyuruh kitai berunding mega tanya tempiling penajam gading sida aya bungai nuing sida ibu kumang bini keling tu deh! Bah meh nguji nerangka seleka dua ampa dipeda nyengala rua tu ngicha ka enda agi bila ila berantika saut tanya bujang lawa ulah jenaka.
Tak nadai nanding nanding...ari bemain enggau raban Armadillo FC lapan puluh satu meh aku tu ngelala penau enggau pengelandik diri. Enti nadai enggau bemain berebutka pemenang dalam kelang masang diri di padang dini deh nemu penau diri ulih nanding urang? Dini deh nemu diri ulih nyaing nyelat urang belaban betendang beparang dataika kembai pala patung bejalai tekangkang? Dini deh kitai nemu pengelanchat penyikar pengerah tulang? Enti kitai lemi baka lumi ditelan segala, enda pia iya? Raban Armadillo FC tu tak enda kurang pengarang deh, ari rintai satu ngagai rintai tiga sama sama enggau gulikipa. Gulikipa ga lanchat amat nepis buah bol ti nuju baka peluru leka senapang. Ari Ali Omar sepiak kanan dataika James Mawan Bala ari kiba meh pagar kebal naka penebal jarang melenti naka penyintal..hahah engka laban bisi bau "Enchaluk" di tengah nyuruh enda rebah kini. Pama mega riak anak lubah ikak Jim Beriak ti beganding bau sama penemu penganti baru unggal Lambat Lindong ti baru udah bekejang berangkat pegi nuju menua ngelala Prairie. These folks were well rounded , selectively very talented few! Ari begulai bemain enggau sida tu meh aku ngelala pengering enggau pengelemi who's who true true! Di beri siku siku sida tu buah bol ba kaki sida..I knew..when, where, how ngelampat ngambat nerima buah bol ari sida tu. Beberekat laban ti ulih 'merening ngiching' tuju tunga serta pikir sida baka ti bisi batu pemandang ngerupit isi ayan tulang sida aki manang.
Tak nadai nanding nanding ga diri empu ti ngelala nemu maya ke kanan nguing ke kiba meradakka nyawa, neritka urang rekung remaung negung nyelaik kaung kaung ngerau ngerak unggal Kenneth Latung berapat ngelunggung nyadi jaguh scorer. Tu meh gaya bala kami seraban betarit asur berinsur insur beberi ajar jaku takar ngagai pangan diri. Tu meh penguntung iya: gerempung beserakup besatu siti tuju tajapan enda sama jaku saum dunju; enda sama igi saum ai. Belajar begulai enggau bansa bukai ti enda sepenatai; begulai enda lama pagila lusa beserara ngejang pulai jauh pejalai . Laban ti ngembuan satu ati saum kunsi tuju deka menang satu lebih ari bala raban enggau belaban, kami seraban nyau baka isi enggau kukut rapat lekat baka engkelulut getah tekalung. Ngujungka penyelai (pemanah enggau penyai bukai) siku siku dikairka tisi nama udah masuk padang gelanggang alai besidi betendang. Ari begulai bemain bakatu meh kami nembiak rat rapat ngelala diri sesama diri datai ka umur lanjur labuh melunggang. Ari begulai bemain meh kami nembiak ngelala penangka enggau pengisin siku siku lebuh maya besatup bedaup enda ulih tagang. Ari bemain bakatu meh kami ti balat gian enda ngenang laluh papung insap ti tinggal belalai begulai enggau penyai ulah bukai. That's two hours and some odd minutes per day taken away from doing any other but main ball..if you see it 'as is' deh Mr. Ang. Tak nadai nanding nanding!
Tu meh peluang ngelala sapa sapa ti deka begulai enggau kitai. Mayuh nembiak ti sesama sekula tak enda berani nampil bala kami laban penyai ulah ti ngemalat nya maya tu. Thanks to those ti sudi besai budi berani ati enda takutka peragam menteri adi. Baka bukit ngelala tuchung; baka tanah nemu langgung meh enti baka jaku sema laban tu meh pemansut sapa sapa ti tau nyadi tuai enggau penitih besai. We knew then , way back then ..how far we have came nyenguk future. Nadai mega bisi tuai tetap tang semua ulih nyadi ketuai enggau penitih besai. Maya tu kelia tak jarang mega pengajar ngeliti meda isi nembiak ti endang dikumbai 'pama' ukai semina ba pelajar tang pengawa luar laban sida iya berat rat ngumbai nembiak ti diau, imun, enda ngembuan ulah mayuh macham, enda gila bemain ngelendatka padang betumpuka pasir, tu endang mensia dikarapka berjaya dalam segala galanya! Only if!!! my now and then and yours then and now would have been so different neh! Tang nya meh laban penyampat pejalai pengidup kitai tu lasit baka sumpit lurus rejang; laju baka peluru leka bangkang.
Tak nadai nanding nanding tak mayuh 'peminat' mega bala raban Armadillo FC tu deh. Hmmm deka mai tudah Apin bemain iya ga bangat enda lanchat kaki semina lanchat jari bemain hoki. Tudah Nubli pan bakanya ga , lanchat jari lanchat kaki sikar tegar empapar tang lemi tulang..tang pama mega transferee ari St. Joseph, Kuching siku tu..dare not touch any Armadillo FC laban iya garang jampat betaritka tisi engka ti suah udah nuchuk diri enggau jarum indu misi kini..gegetar jampat kudi. Pama meh bisi tau nyuruh bala indu dara begancha pulai ke padong lelungan...eeewahhhh ketawa ngenang ulah bala kami tajapan agi semina pom lima tang enggai alah! Besari sari begempuru bejaku ngiga jalai ngalahka tim raban bukai, ngerituk nyungkit pengering enggau pengelemi ngiga puting pampang rebuh diserang. Tak nadai nanding nanding...enti nadai kala bemain dini ngelala utai ngenumu tu amai meh tak dipeda empepai alai baka engkelait nyulur nyumbuk ngelantar nadai penyandih. Tu meh maya bala kami mansutka tension enggau pengisin muang muai penyarut tali untak deh ibu aya. Mayuh meh utai bukai ti ulih maya begulai bemain tu; ukai semina tak lelunggak lelanggak lelak ikak.
4 comments:
amat nya ari ka bemain meh kitu ulih nemu mayuh urang tuke ngelala orang. ukai naka nya aja, itai mega ulih ga nemu ulah siku siku
'ngall gerubi tuai,ka enda ngungal ke nn laban tua tu serambau.[ari nama ti disebut nn baka Inyau Bada,Andrew Blassan("Landak" ko kami)Norina Umoi,Endu Mary,Shopia Hassan,Doria John,Julia Itang,Chang Chu San,Lily enggau Joseph Bunyau]Sida tu x-agustinian sama sekelas enggau aku sekeda ari sida tu.Mulai ngagai kebuah ti bendar aku ngelalu kediri tu nya meh,rindu amat aku ninga rita kenang nn ba blog nn tu.Semua utai ti dipansut ke nn nya sama bendar enggau batang pengawa aku maia agi sekula menya,enda berasai nitik meh ai mata lebuh ti malik kebelakang ngenang ulah maia nya.Nesal ? Enda ga nesal ngal laban nya pejalai ti dipilih kitai,laban siku2 kitai enda sama.Maia sekula suba ngal,sangka aku tak nadai org tegar ari aku ti bemain bol,sepak takraw (org ti terubah nepang lipat tebalit,ko org suba maia nya LIPAT .......sukan pan bakanya meh ngari ke bagi kedua,rekod lompat kijang enggau lompat jauh antara sekula bagi ke2 dlm taun 1979 onward.....(enda nemu diatu udah pecah ke enda ?)Nama kebuah aku mansut ke utai tu ukai tak jejak2,ukai ngangkat ke bakul diri tang ngenang bala pengajar maia nya kelia tak nadai runding endar tegal kitai ti nginsap n bepangan engka sida enda ngereja pengawa nya maia umur kitai ? Diatu aku nadai nginsap badu sekula kelia lalu badu ga nginsap engka nya nunda pangan meh.Ila nampung baru agi belala tang meh bc pengawa deka di putar,mantar hari merdeka kami ditu.Do we Sarawakian really MERDEKA 'ngall gerubi ?
Neat layout this GT. Happy reminiscing the good, the bad,the ugly. All that made school days and life in general go around. Stay groovy. Cheers and good days to you and the folks..
GR,
Bakanya meh tarit utai ari perening aku suba, bisi nguntungka lalu bisi ga nya ngerugika..nitihka pengambi kitai siku siku, enda pia.
Anonymous unggal,
Terubah iya unggal, meri besai tabi basa serta terima kasih laban bisi ninggalka kumin seleka dua.Terima kasih mega laban nyau enda ingatka Chu San enggau Lily Bilun akai daiii unggal nyau pemayuh iya meh nya..nyau enda ingat. Sida ti disebut nama nya unggal serambau enggau aku mega sekula di Tanjung Lobang ari pom empat ngagai pom lima, sekeda datai ka pom enam. Akai dai unggal, semina ngenang ulah maya agi sekula suba lalu arapka nembiak ti bisi ampit macha anang nunda pengawa kitai ti manchal..pandai pandai meh enti deka ngemajuka pengawa manchal enggau tatau tu. Unggal, pama kita kelia enti bakanya..I managed to melatih diri ngelipat laban meda 'Ikram' ba Takraw..enda berani deka nunsangka diri baka Sharkawi Saie kelia hahaha. Enti nuan bisi ngarika bagi kedua ba lumba enggau main engka bisi nuan belaban enggau bala ti dikelala aku kelia ari Simanggang..Duncan Merudi enggau Apo Latit! Engka bisi belaban enggau Ensalang(Gerald Templer)ba merejuk panjai. Kenang pasal lumba enggau main lalu bedau dikenang unggal..lapa enda ngenang udah tu ila..endang amat..nembiak ti ngarika sekula belumba enggau bemain kelia jarang diperatika pengajar..pama enti kala nempik bau madahka nembiah well done tauka congratulation...enti bala kami kelia selalu nyadi buah mulut pengajar dikumbai sida iya enda tau nyadi mensia laban ti selalu limpang bemain! I'll leave this at that meh unggal. Hmm nginsap..lain cherita mega...manah aku nginsap ari ti nuchuk diri ngena jarum belitan heroin neh! I have seen them all..next to me in the playground munyi ku jaku muntang.
Apooo tusah mimit nyaut tanya nuan unggal..are we or are we not. Enggi aku, merdeka within laban enda belalai..belalai lalu setuju enggau utai ti dikenggai ati, ngelaban penemu diri empu...bula ka diri empu ga kitai enda pia? The title of my song unggal, " Merdeka dalam ati" ..maybe I'll create lyrics for it next time..In a way, we are nitihka definition ti amat amat bekandang..we aren't in a way. Tang perening kitai siku siku unggal, lebih agi kitai di Malaysia, di influence by where we work, sapa enggau begulai, enggau pengawa bukai mega..suah ngelaban prinsip pengidup serta adat basa atur chara pendiau kitai mega. We are then our own very worst enemy! Tang kitai jampat nunjuk nyalahka urang ti ngimbai kitai, here, there and everywhere meh. Umbas nya ehh..
Podgee maam,
Thanks for the compliment. Good guys finished first; bad guys finished last..hahaha. I will bring forth the living proofs very soon that bad guys can finish first as well, equally good if not better. Make no mistake ya..school life( bad or good..perhaps a lil' bit of both) molded us and have complimented our 'Ws' through and through lah. Happy reading and translating too. Happy Merdeka to you folks!
Cheers.
Post a Comment