Tuesday, September 12, 2006

Sinu Ngenang Kesatu....

Aki Gerubi, laban ti udah nagaka diri empu di ambi besekula ke menua ribai belang ngelampai, nadai meh maioh macham..belajar nitihka urang tak bakanya aja anang enda...semadi ngaminka aja ku keda ti bisi duduk ngimbai seruran nelai. Engka baka munyi pesan ti ditinggalka pengajar ari Australia, Daud Kubu, "school is a joke to BDFS" dalam lambar karung bup pengingat sekula benama ensumbar Optima. Di luar nyelai lalu di dalam din sapa nemu nyagam enti enda diri empu, enda pia? Tak enda berasai mega tudah aki gerubi laban sinu ati meda anak mensia siku ti betawing bekaling enggau ganja nyuruh gila. Baru iya meh tu meda jelu antu semacham tu. Nyau melabat batang urat kelekuan tudah kaban laban ti ditanchang enggau kubal getah buatan negara; nyau bedemaram tudah lengan laban di rejang jarum mata belunchum. Din ditu, kia kia meh tudah aki gerubi ngemataka tudah kaban enggaika kur semengat..tak ngeliat bendar ngetat; enggaika tak bepeling naning belebigau mutah puang nyuruh telentang. Nemu mega urang malas budi basa kitai tajapan kitai ti dikumbai urang nembiak jai enda betabi. " Jangan susah bah..mun ada apa apa hal di Kuching call aku ajak," ku pesan kaban. "Jangan takut ehh..semua miak sitok mestinya singgah di Kuching one way or another..sound ajak ..kan jauh ya," ku munyi tangkan rentayan leka pesan maya kami. Sigi udah madahka diri pas pan iya pom lima sigi enda mulaika diri masuk Tanjung Lobang mega tudah kaban siku tu laban berat rat deka belajar tauka bekereja di Kuching, menua asal iya empu. A man of his word laban bisi dua tiga taun udah nya aku 'sound' tudah kaban siku tu di Kuching maya ti bisi becherengang gereginsa kudi ukai bebuti.

Sekumbang ti udah mantu serta nyelamatka bala nembiak sekula ti tepekul laban tiki ai pasang gelumbang tu tak nadai pengawa bukai bala kami ti pom lima...belajar peresa belajar udah makai tinduk betundi enggau pangan diri. Padang pan nyau puang kurang urang laban pengawa beperesa tu..Sida pom enam atas pan bakanya mega; sama sama ngatika diri ngulihka kengka utai ti udah dipelajar. Siku dua ti berani nurunka padang nyuruh bala pengajar nyau munchung semunchung mulut laban dipeda baka ti enda ibuh ka pengawa peresa. Aki gerubi was one of them..enda ngelengka ka main lemai hari! Tu meh maya kami sebala beserara enda lama enggau bala sida pom enam baruh enggau pom empat. Datai kita taun siti tu ila, 1982, engka mayuh bala kami pom lima tu enda dipeda mua mata agi! Iya ti bisi pangan, bujang enggau dara, aduhhh nyau baka ti beserara nadai mimpi deh; bekepai bye bye see you later enti umur panjai menuku pejalai. Ahh ku bala, enti bisi nasit nikal pulai lapa enda napatka tembawai lama jerami memudai munggu berundai. Nya meh pesan endu dara menua tungaka Sarikei nuju aki gerubituai. Enti nemu ngalihka leka lagu 'maya permisi betemu baru' nyau ngalihka iya 'masuk sekula betemu baru' deh tang nadai daya. Berasai betuah ga aki gerubi laban ti bisi endu nyadi tawing ngembing ari sepiak. Enti enda, nadai iya, kada enda belipat ganda beribu gaya ulah. Pama ga nuan diatu ibu ngansak belajar bejaku enggau bup ari matahari pambar sampai ka pegu nyau gutak gutak lunggar. Beserara dulu meh tua endu...enti nasit manah taun siti ila tua begulai baru bekelukih baka tukih di panchar anak bulan gerempung bintang berandang.

Bala sekeda pan lain mega kelukih maya bisi lapang puang; maya bala begempuru begelumu betungkunka insap ukai dibeli tang berutang ba Nyonya. "Keni pan result kua ila, enda meh kua pulai kitu agi. Puas udah kua ngasai," ku Paul. "Caluk balitka kalau pas," ku tanya Neilson malikka Enchaluk. "Eh, don't know me..mungkin lah," ku saut tudah tuai iya. "Ali, you coming back kah," ku tanya Phillip nuju Ali. "Hahahhaa..apalah kitak tok..balit semua bah..mesti pass semua..sida nok ada bini tok memang balit sitok agik..kita apalah..balit nyuruh tok janggut pening kepala ajak cukuplah," ku Apin nyaut betundi. "Buat apa? Kau sik puas kah jadi mangsa tuduhan..setan benar ko tok ehh..I sik mauk..I masuk ajak ITM," ku Ishak nenung pejalai diri. "Hhehe mun kitak dapat 1 ada chance overseas ," ku aku ga.."Ya lah..mem you mem," ku Ishak ngemanjaika jaku tundi. "Sapa mok ngan kitak iya..gamal jai, makai rangka, mati enggai," ku Apin ketawa rakah rakah lalu ngujungka bala ketawa magang. Tajapan bakanya, kami nemu mayuh ari bala kami serambau endang enda mulaika diri nampung pelajar ba Tanjung Lobang taun 1982 ti deka datai tu ila laban tuju ati enggau juluk sengkuar siku siku nyelai enda sama. Nasit aki gerubi pan bedau meh temu...hmmmm. Tu meh baka kengka iching perening bala ti tau nyuruh aku siku nemu sinu ngenang.

Sinu ngenang diri ti udah seperabung bekunsi lantai sepinggai bekunsi pemakai enggau bala ti udah enggau bekelala begulai asai diri menyadi. Maya bisi suntuk sandat seput tesat, maya bisi enda nyamai nadai pengerai, sida tu meh ti bisi datai mantu nemu ngenataika sampi penyelamat nyawa. Bala sida kaban bukai ti deka beperesa HSC, pom enam tinggi , pan bakanya mega. Sida tu ila, enti enda nampung pelajar tinggi agi engka meh nyelingkutka nasit nyelit urang begigaka kerja ipak diri empu, engka meh sida iya bekiraka deka belaki bebini nirika rumahtangga ngidupka diri empu. Things endang just going to be different tang pejalai majak nuju ke mua belama, nyingkang nitihka pemansang dunya. Endang gaya iya meh tu laban pejalai pengidup bedau tepantup ba bandir. Ari iching perening peda tela aku, semua sida ti deka ninggalka bekau ba Tanjung Lobang 1981 tu ila tau nyadi mensia menyana magang. Engka mayuh bala sida tu ila nyenguk UM, USM, UKM, UPM, enggau ITM serta mega tempat pelajar tinggi di menua tasik ti bukai. Ehhh kenama enda Ang sedekan nelan liur sembur jaku diri empu! Tu meh naka sinu ngenang renggat ti berapa?..ahh nadai ngitung ehh..udah nasit udah selatan.

2 comments:

Anonymous said...

Sapa2 ka maca utai ka di tulis nuan nang sigi rindu..pemanchal nuan nadai ke banding... pajak ka karang nuan..and hey "engkerutak damon" is a gus ensumbar for u..

god bless

GerubiTuai said...

Terima kasih anonymous laban bisi limpang enda lama mansa blogosphere aki gerubi. Bisi ga aku ngena ensumbar "Engkerutak Tanah" kelia, maya betundi ba Randauruai enggau bala.

GR, hmmm baka munyi nasit aku ehh..ngarapka indai aja nyengulaka tua! Nadai ngawa, belajar di menua enggau di menua tasik sama aja, nadai pengurang nadai pengelebih. Ti pemadu beguna nya pelajar enggau pendiau pengidup kitai udah ngelengka sekula. Bakani kitai siku siku mai diri tu meh nyadi penentu kitai empu. Myself, laban bisi empat lima kali deka di ambi urang belajar ba menua tasik ari pom tiga sampai pom enam..lain mimit tajapan enda nyadi. Chara berunding maya sekula pan nyau nyelai mimit kelia.

Cheers.