Rarih ripih udah nasit, udah selatan renggat kedua dalam kenang pengarang.
Masuk sekula peraimeri satu di menua ulu kelia ukai baka ke diatu deh. Nurun bejalai kaki nyau baka ti belumba enggau pemansut matahari laban enggaika ditinggal ke luching pengajar berengkah ngajar. Kukuk manuk kelabu entebalang bangku kepayang banda gerunggang, kukuk ijau kunchit labang ensulit banda pipit asai ti agi tetaing didinga pending ayas nampung didinga. Tu meh maya, penerubah iya bepansa mua enggau tudah apai.
Wah..wah..wah..narit seput nengkadah..naka meh penyigat urang tuai deh! Sigi patut tau digelar manuk tajai betisik bidik mayuh ambai. Asss enda sempat nyeremin diri mega maya nya deh tudah aki..ni nemu engka bisi puni getah ai penyigat enda begamal jai..hehehehe. Engka nya sigat laban perenching baju mansau besurik mirak dalam ti di gaga ba takai madang engkerebai tedai belabuh pungga bebali belumpung kini. Sigi baka gaya urang kerja perintah kenu ku jaku ga nyeling nyeling enda berani merening. Bisi sekeda madah bekerja ba CID, bisi mega sekeda madah ba SB ari soldadu army..enda meh nemu tang engka amat Special Branch unit askar soldadu renjer kini. Jilis asai ati aki kelia meda gaya urang bepengawa bakanya hahhah.
"Nya apai nuan sanu," telai bala sekeda nembiak bukai ke tuai tuai lebuh begulai bejalai ngitung pemayuh batu jalai mansang nurun sekula. Hmmm.."Lapa nuan enda nanya iya dulu deh," munyi bala ti jenaka mimit. Tak enda berasai tudah aki nyaut, laban ti sigi pama penangka. "Lapa iya enda nanya aku deh? Enti urang nanya kitai nyaut. Enti urang enda nanya, kitai diau aja. Enti urang mansa, anang belalai," munyi sembur kechepur tudah aki Gerubi. Ah..nyau rarah bulu kubah, nyau tumbuh bulu nyumbuh baru ngelala! Udah nasit, udah selatan...
Pikir enggau runding, tajapan baru serandu buah rampu, setaun buah entimun..enti dirujak belai dikerauh perisi, endang sigi nyelai. Aki Gerubi enda kediri laban diatu puas ngemataka pengamat nasit bakatu nyadi ba nembiak bukai ti ngempu nasit sebaka. Dipansik ditilik mensia bepelajar tinggi nasit atur petara ti tau nudung ngelindung, tau nyakal nyuruh nikal bakatu. Tajapan bakanya, dini deh lebih ari peneleba serta benasit ngasai deh! Sigi tau amai nyuruh isin darah bepusin. Multiply pengisin diri enggau seratus, nya meh penyampau pengerindu enggau penyayau urang ke kitai...Nama mula! Udah nasit, udah selatan.
3 comments:
Bah, ni maya umur nuan bisi bekelala amat amat enggau apai nuan? Bisi?
Sinu ga macha cherita nuan, mina berani nyeling, meda apai mansa.
abas meh blog aku.http://missnny2006.blogspot.com
Endun, the twist and turn will soon get interesting! If they weren't motivational and inspirational endun, don't know what else would have pushed myself..nyadi peransang lumur satu. Ngelala very late in life, but there a whole chapter on that soon. If and when I decide to have it published..hmm we will see.
Post a Comment