Tuesday, May 12, 2009

Kali ti penudi sebedau pegi.......

Bemain kali penudi:..
Tu meh engka kali penudi bemain bul enggau bala kaban ti udah bisi ampit begulai enggau aki Gerubi di Batu Kawa, ti udah begulai ngajar ba SMK Pending. Apuu nehhh nadai meh ku enggau deh, nadai meh agi enggau bala kita ngensung munyi burung tiong andalka buah tamang raja; ngensung munyi apek busung enda ampit indu dara. Enti kemaya tu aku enggau kita mudik ai USA, Ulu Sungai Apong, tu ila aki gerubi nguji merau mudik ai USA, Ulu Sungai Amerika deh. Lengka ka dia dulu meh jaku tundi kenang bebuti tu tadi. Endang udah ditagaka laban bala pengajar ti enggau bemain mayuh pandai bemain. ..Minggu final PSKPP bagi kesatu tu meh kali penudi aki gerubi bemain bul begulai enggau pengajar ti sama sama ampit ngajar ba SMK Pending, Kuching. Udah nya bisi ga ampit dibai bala bemain piala SADIA lalu bulih lumor dua maya deka ngerami Gawai Dayak 1985. Sebedau nya bisi ga dikangauka bala bemain tujuh sepiak ba menua kaban Bidayuh di batu lapanbelas. Akai tak bemain ari pukul semilan pagi sampai pukul empat lemai..nyau ikak nyau lelak meh asai tubuh tajapan agi rumpah bujang nyelah ngeranah. Tubuh pan nyau madai berasai disepi di asai. Nadai enda ngemuaska diri laban kemaya meh tu ulih enggau bala kaban bemain begulai baru. Benasit nadai MJC alai ngurut tubuh ti madai enda enda asai, alai bekaraoke belagu semina duduk berimbai. Weeeeewwiiittt ku kitai deh.

Gawai ti penudi…
”Aram sanu enggau kami ngabang ke Kampung Semeba,” ku Patrick Ngindang ngangau ka aki gerubi. “Ila lama nuan enda enggau Gawai”. Nama deh, tak nadai bekira dua tiga kali lalu nurun enggau ati gaga laban bisi bala enggau bejegau maya hari rami. “Anang mayuh ulah. Kami tu enggai digagai apai indai urang,” ku tudah indai nyerarat mesan penapat ari dapur laban ti ulih nela ulih meda utai ti tau nyadi sekali engkijapka mata. Pieeee..nyau beteguir bala anak mensia pulai ke rumah. Malam hari siti lalu di bai bala menyadi ngabang nuju menua ti di kumbai urang Merdang Gayam. Jarang lebu ga tudah aki gerubi pama nurun. Ila kemaya meh ulih begitu begini bakatu bakanya agi enti udah belelang jauh nyelat urang. Baka ti ngiga ulih enda ga nya. Pandak jaku, bepansa sekali berimbas enggaika puni enchuki ensepi asai tu nadai ngawa iga. Nya meh ku urang tuai kelia, berani nebang berani ngesan. Tu meh baka randang rembang aki gerubi sebedau pegi betapa sari.

Minggu ti abis penudi aku nengah nujah kali lima pasar Kuching pasar Simanggang. Sempat ga aki gerubi nemuai enda lama ngabas menua ke Undop lalu neresa kaki lima pasar Simanggang. Akai dai..Undop meh ti bisi ampit ngajar aki gerubi bekembuahka lada, betangkalka getah, betungkuka padi, enggau pengawa menua ke bukai mega. Tu meh menua ti betuah bisi nasit mai aki gerubi nemu enggau urang bebubu ngasu beburu. Kada agi meruan kampung jerung ti alai nyumbuh tunggal begagai pagi; alai bujang manchal begigaka bini enti aku pulai nemuai dudi hari! Endang udah masuk akal ga utai bakanya kelia. Nadai ku enggau meh enti sema enda ampit meda kayu rebah menua berubah. Mayuh mega bala ti serambau begulai sekula enggau betemu alai ulih betabi meri jaku goodbye ku ribai selamat bejalai ku kitai, saum penyiru beberi jaku selamat tinggal pagila lusa kitai betemu baru enti umur panjai nadai apa nadai nama. Nadai ku enggau meh laban udah nasit di beri petara. Bisi bala sekeda jauh pejalai lalu bisi ga bala sekeda jauh pejalai dalam mimpi tengahari bakanya aja…..

Mupuk aku, enda lama……pagila lusa kitai betemu baru, enda pia?

4 comments:

ibankiih said...

landik endar nuan ngarang ngena jaku abstract ney aya...enti baka urg ke umbas ngemeran ke jaku iban sigi enda tentu tesagam ke reti sekeda biau jaku nuan.manah...rindu macha karang baka tu.Senaya mua pengajar jaku Iban agi besekula suba, niang cikgu Jiram(sekula primary)enggau cikgu Edwin Jaya(sekula secondary).

CoKeLaT-RaWkZ said...

Dixon, heehe.. Pat here. akaidai, uji nuan tahun 1993 kelia ngajar aku bhs. Iban.. nadai aku bulih D ba PMR haaahha.. nama aja Iban. malu mat.

GerubiTuai said...

Minta ampun seduai laban lama enda mansutka diri kitu...oooohhhaaaa Selamat Udah Gawai Dayak...
Ibankiih: semadi rindu ati ngarang ngena jaku kita Iban.
Pat: Apooooo nadai kala ngajar jaku Iban ni ulih aku tu ahh..Granted I took the subject off and on ari 1971 to 1979 tang guarantee enda ulih ngajar Iban..Result LCE aku kelia okay ga hahah..chukup dempa heheh.

PAK MARDI said...

Terimakasih banyak AKI karna melalui jalan togel ini saya sekarang sudah bisa melunasi semua hutang2 orang tua saya bahkan saya juga sudah punya warung makan sendiri hi itu semua berkat bantuan AKI JAYA yang telah membarikan angka 4D nya menang 275 jt kepada saya dan ALHAMDULILLAH berhasil,kini saya sangat bangga pada diri saya sendiri karna melalui jalan togel ini saya sudah bisa membahagiakan orang tua saya..jika anda ingin sukses seperti saya hubungi no hp O85-244-015-689 AKI JAYA,angka ritual AKI JAYA meman selalu tepat dan terbukti..silahkan anda buktikan sendiri. 2D 3D 4D 5D 6D