Ngujungka Minggu Bekelala..

Ngibun pendiau diri enggau netapka diri diau ba bansal injau sekula benama Kenari tu ukai nyamai, enti kitai enda kala mindah enda teleba kediri ari rumah. Semua utai ngena maya nitihka pusin matapanas. Mandi, makai, tinduk, belajar, bemain semua nitihka pangkung jam ti digantung di dinding. Mensia enggau begulai pan nyau enda sama ulah saum telatah, bisi manchal, bisi jenaka rindu ketawa, bisi diau diri ngati kediri serta ngembuan adat tebiat tabi basa ti enda sebaka laban kami sekaban ari semua pupu bansa menua Sarawak. Jaku enggau pengarap pan jauh nyelai. Bisi sekeda kaling ngira diri nurunka Masjid surau menua, bisi ga sekeda ngusung ngerija RC enggau Anglica, lalu bisi mega bala nemu ngabas rumah Tuan Pikung bala China. Jaku pan enda kurang penyelai iya, tajapan kitai sebansa Iban sigi tau kaju seruran saru laban jaku laban bagi ketiga enggau bagi kedua ukai sama..be- empai empai be-bedau bedau, be- aku aku , be-nuan nuan, be-dik dik, be-kua kua semua bisi...hah tau dikumbai kitai rujak menua Sarawak. Akai dai...tu meh gaya iya bala kami ti betuntutka penemu engka icha dudi hari jemah ila tau nyadi mensia menyana, belelang ngiga sakang seribu guna, munyi guntur beguruh bemimpi ngiga pengaruh engka icha jemah ila tau bulih degree bulih phd nyadi menteri adi pemansang dunya. Tu meh mimpi bala kami tajapan semingu minggu merinsa dikeduan, ditundi, dikeluji enda biga iga bakanya. Semina umur enggau jam meh ulih nentuka pemutar penikal senayau pengidup, enda pia?
Aram limpang enda lama, malik ke belakang laban enggai ninggalka pemutus pengujung minggu bekelala ti ditangkan enggau adat main bol antara pom lima enggau pom empat. Nadai mega bala kami pom empat tu bangat kurang laban bala udah bekelala lalu nemu penau serta penatai pangan diri dalam lumba enggau main..enda tusah begigaka pengari! Bisi bala enggai bemain laban enggai pedis ku jaku. Sekeda ti ka apooo nyau meh ngajung nama deh. Hah bala sida pom lima endang udah ditemu ari jaku tusoi bala seniors landik bemain bol laban ti bisi pengari baka sida unggal Cobbold Lusoi, unggal Lambat Lindong, unggal Bunyak, unggal Christopher (Zainuddin) Guang, Stephen Lalo, Dunstan, David Gombek, Saidin, Azman, Bakar Barat, Kinchu Ajan, enggau sida bukai mega. Ahh berengkah meh bemain...mangkin lama mangkin kasar bala mensia. Nyau belanchar lanchar bala mensia bejarauka pangan diri. Engka padang lichin laban ti udah di tinggang kemi ini andan kini! Jari jampat jari datai kaki lanchat kaki merawai. Tegu nyadi tuju, tulak nyadi lantak gaya mensia bemain. Ah ku jaku ga engka meh reperi tu batu api! Enda ga semua bala pemain ti bakanya, ulih itung enggau tunjuk jari kanan. Ari adat atur chara sekula ti nyuruh utai bakatu nyadi ba mua mata siku meh tudah bala kaban baru aku ti baru dipasukka ba pom empat nyau baka mayau bekaki tiga! Zaidil, Lukas, James Mawan Bala, enggau diri empu nyau ngemaduka diri laban tu ukai adat bemain bol. Tinggal sida unggal Mart Amat, Affendi Rosli, Stem Liu, Anthony Edward, Joseph Bunyau, Alex Liu, Nooruddin Liew, enggau bala pengari bukai mega. Akai dai..indah ga Kawi ti ngarika Landas di Simanggang ti rindu beparang nyipak tiang nya ga bakatu, ku jaku dalam ati ngenang. Tu meh ti ngajar bala ti dudi..do unto others what others have done to you! This had been the long-established tradition. Tang tanya dalam ati mengkang meruan nanya peneguh serta penyauh adat bakatu dipejalaika. Laban pengajar ti enda ibuh, engka tau meh utai bakatu dikerja dudi hari enda pia? Nya meh ku kitai, kera meda kera betanda! Tu meh ngujungka minggu bekelala taun seribu semilan ratus lapan puluh.
Tau meh tu mupuk belubah lubah nitih ka urang laban pemedis ga kurang mimit di asai. Nyau maioh macham mega pengawa berijista tu berijista nya bala kami ti baru. Nyau bisi 'rumah' magang bala kami. Hahah aki Gerubi tak dipasukka ba 'rumah Pelanduk' ahhh..kami duai Joseph lalu ngansak siku nembiak ti baru datai ari Balai Ringin ti mansa ngena baju sandau berukir 'First Division' ba belakang deh. Kaban siku tu tak mukai mukai ga..pemegai rikud belanda mechut seratus mita bagi kesatu baruh umur 16 taun. Tekang gemala ti ngujungka rumah pelanduk megai mangkuk champion tiga taun beturut ti deka datai! And there was this guy ti di kumbai kami 'kijang' mula mula iya laban ti megai rikud engkechit merejuk kijang lalu 'enchaluk' later ti nadai utai enda alah perejuk iya..ngujungka iya nyadi tanding lumur satu pengari bagi ke-empat, Yusuf Bujang, ba lumba merejuk jauh pemanjai. And there was Sutomo the clown ti selalu merindang bala kami ti baru nyuruh ketawa enda badu badu. Tajapan bala kami ngembuan seribu ulah siti leman nadai ga bangat mansutka diri ari kerubung malu tekuyung laban kitai ga baru datai, baru nyelat urang ti udah teleba begama malam enggau menua. Engka dudi hari ila meh mantaika pengelandik enggau pengerindang bukai. Tu semina nerang nandang ka sekeda ari bala kami pom empat tu ti ukai semina landik macha surat abc keladi dalam hutan, ukai semina lansik bidik ngindik sekula alai penyangkai bala soldadu jipun nepan, tang tau di sabung baka manuk biring sengayan.. Udah nasit udah selatan meh tu sempat ampit ulih begulai enggau bala ti datai ai Limbang datai ka ulu Simanggang., ari punchak menua Borneo datai ba tasik besai begelumbang.

Pom Empat A(1980)KTDTHB, Miri

Duduk ari kiba: Jacqueline Ajang, Saadiah Tu, Alice Tepung, Cecelia Giang, Uztaz, Ali Omar Hamid, Gerubi Tuai, Alex Liu, George Jago.
Bediri tengah ari kiba: Rosty Rundu, Sandra Ringgit, Monica Justin, Halimah, Rose Budit, Noraini Ahmad,
Sophia Hassan, Mary Kayong, Phillip Singkek.
Bediri belakang ari kiba: Azeni Sahat, Apin Pauzan, Mart Amat, Neilson Ilan Mersat, William Jawa, Constant, Kedung Luhat.

Tu meh gamal bala kami ti di pilih urang masuk Pom Empat A.
Jacqueline Ajang: Siku indu bansa Kayan ti enda inggar bejaku. Kaling GerubiTuai sampai pom enam!
Saadiah Tu: Siku indu bansa Melanau ari Dalat. Tan seput bepupuh belanda ngarika sekula. Landik dalam semua utai iya siku tu.
Alice Tepung: Siku indu bansa Melanau, a sister to a well-known ex-Tanjung, Lapuk Tepung. Kasih tudah Alice laban ti selalu kami tundi besari sari..enda nemu ringat sekali. Sorry Alice, laban selalu nundi nuan.
Cecelia Giang: Siku indu bansa Iban ari Lutong. Nelap serta nemu enggau betundi.
Uztaz: Hmmmm enda nemu tuai siku tu..tak rangkai enda nemu bejaku sekali iya ga enda nemu ngajar serta begulai enggau nembiak! Patut dikemilutka nembiak.
Ali Omar Hamid: Siku nembiak ti datai ari Limbang. Selalu 'ngangkut insap' ari Brunei. Rindu serta landik bemain bol. Sigi tau nyadi tuai tajapan manchal mimit ari urang bukai.
Gerubi Tuai: Datai ari Simanggang. Mit gamal tang jampat ngigit! Manchal , penginsap enggau pengirup. Siku ti rindu serta landik ba pengawa lumba enggau main, bemain bol, Hoki enggau Takraw. Rindu bemain gitar mega.
Alex Liu: Siku nembiak Kayan ti datai ari Belaga??Kinggar bejaku tang landik serta ngembuan pemandai ti tau nyuruh ia nyamai dalam pengidup dudi hari. Rindu bemain bol serta bemain gitar serta landik jaku Iban.
George Jago: Siku Iban ti datai ari Julau serta siku nembiak ti ngembuan tabi basa. Pendiau serta tau dikarapka nyadi tuai. Landik manduk/beguringka dog meat!!! Pama dek chak! Guarantee jauh pejalai.
Rosty Rundu: Siku indu Melayu ti datai ari Simanggang . Landik dalam pelajar serta jampat ringat. Nemu bejaku Iban enggau bala ehh.
Sandra Ringgit: Indu Iban datai ari Saratok. Manah enggau begulai, enda nemu ringat enggau betundi tang deka mandam belakang belama.
Monica Justin: Siku indu Bidayuh ari Kuching. Nadai bejaku enti enda ditanya! Engka shy shy snail kini hahaha.
Halimah: Aduhhhh indu Melayu ari Miri tu munyi semalau kuchau kuchau enti udah datai..landik dalam pelajar. Dijangka kami jauh pejalai iya siku tu ila.
Rose Budit: Indu Iban ti datai ari Niah, landik dalam pelajar serta nyamai enggau begulai.
Noraini Ahmad: Selalu merak kami laban ti suah nundi iya hahaha..penyiru serta penyayau ti datai ari Bekenu tang manchal. Selalu deka nyubit! Ditagaka jauh pejalai dalam pelajar.
Sophia Hassan: Datai ari Betong. Pendiau.
Mary Kayong: Siku indu ti datai ari Betong. Apooo engka bisi nangkin batu lelayang iya tu..laju endar belanda. Nyamai enggau begulai.
Phillip Singkek: Ari Saratok. Kediri belama lama tudah tuai. Siku ari bala penginsap ti enda kala di tangkap pengajar nginsap sepemanjai umur iya belajar ba Tanjung Lobang. Siku ari nembiak ti disangka jauh pejalai mega.
Azeni Sahat: Ari Lundu serta landik bemain hoki. Enda takut ke urang tajapan pendiau. Sigi ulih jauh pejalai siku tu.
Apin Pauzan: Siku nembiak bansa Selakau ari Kampung Pueh, Sematan ti landik bebelitka jaku. Enda nemu takut serta nadai utai dikenggaika. Di beri ensumbar 'Sitan Pendek' laban ti paga pandak. Ukai semina landik dalam pelajar tang landik bemain hoki mega...pengirup enggau penginsap. Siku ti tau jauh pejalai ba semua pengawa mega.
Mart Amat: Siku nembiak bansa Kelabit ti landik bemain bol serta dalam pelajar mega. Pendiau serta ngembuan pengerajin ti tau nyadi teladan enggau chuntu nembiak bukai. Endang di sangka jauh pejalai mega tudah akih siku tu.
Neilson Ilan Mersat: Siku nembiak bansa Iban ti nelap serta nyamai enggau begulai. Ukai semina landik ba pelajar tang landik dalam lumba enggau main mega, ngembuan pengerindu bemain bol, bemain takraw enggau bemain hoki. Rindu bemain gitar kaban kami siku tu. Sigi ditagaka jauh pejalai ba semua pengawa.
William Jawa: Nembiak kitai Iban ti datai ari Lubok Antu. Liam tu enda engekeretik tang pama ga tudah tuai iya. Landik dalam pelajar.
Constant: Nembiak bansa Bidayuh . Nadai inggar laban ti jarang bejaku.
Kedong Luhat: Pama akih kami bansa Kayan siku tu. Boleh tahan pemanchal iya. Siku bansa kayan ti landik bejaku Iban, bemain gitar enggau belagu. Ngembuan pengerindu bemain bol mega. Sigi tau jauh pejalai ba semua pengawa bakeh siku tu.

Meri besai terima kasih ngagai Mdm. Podgykat laban ti sempat mandangka gambar kelas tu. Maam, without you this chapter wouldn't be possible. Thanks and thanking you in advance for the next one as well.

Minggu Bekelala....

Minggu nelebaka diri bekelala enggau menua Tanjung Lobang seribu semilan ratus lapan puluh tu meh endang pugu pait pemanis pengingat. Tajapan semilan puluh semilan peratus bala kami ti masuk pom empat udah namaka diri serta ngambu sitak panggau penuduk peninduk diri empu ba Kenari dormitory; udah ngerijista diri masuk sekula, bisi ga bala ti laun datai..entah nama kebuah kitai enda meh nemu cherita mensia! Bendar meh asai aku diperak bala seniors..engka amai deka nengelamka pala kitai ba lupak kini..nadai nadai utai bahlah tak diperak urang bakanya. Hmmm 'terror' pia enti kitai bejalai begembar dua tiga iku ketuchum ketawa gaga udah bekelala nurun nuju bansal makai? Ku runding meh...engka enda kala ngelala utai ti dikumbai 'terror' meh bala sekeda! Kada kala ngasai enggau urang bebungkarka tayar basikal belalai di pasar sida tu? Engka sigi udah adat urang ditu kini?!? Ahhh ku sekeda ti nemu mimit..anang irau, sigi gaya iya..udahnya ila nadai sida bangat deka ngeluji nundi ngachau baka empeliau deh. Akai daii tak nadai beberi maya sekali; ari dani pagi datai ka tengah malam...seminggu nyau ga dua minggu..hmmm tak enda ngetu nemu badu meh sida tu. Nurun nuju kelas pagi hari pan di ipa bala nyuruh bejalai bebaris meresa pekaian masukka ruruh laluh pemanjai baju ke dalam! Bisi ga sekeda ti nyempelah nyuruh ngeruntun ngeluarka laluh pemanjai baju tu ari punggung! Tuck in tuck out tu nyau nyadi main. Lapa meh bala pengajar bangat enda ibuh neh? Engka bala pengajar enda nemu kini! Pulai ari kelas tengahari pan dititihka bala sida tu mega ngagai Kenari! Bisi bala sekeda nyau jengkak jengkak disuruh bala ngereja 'jumping jack' lalu bisi mega bala tak nyau meragau di suruh urang eksesais nganjil semin. Diri empu pan bakanya ga, nyau maioh macham pengawa digaga ti enda besangkut paut enggau pengawa sekula! Ahhh nadai ngawa, tat ka aja ku jaku ga. Malam hari nadai dikira agi deh..seminggu minggu merinsa di gaga bakanya. Enggai nyadi tu, udah ga jauh ari menua, berasai rawan takut ka bala seniors ..dini bisi nyamai pendiau deka belajar! Bala ti enda tan nyau meh mulaika diri ka menua! Tudah unggal Dingun lalu ngebuka diri pulai laban enda tan, seruran gisi gisi belai ai mata! Semadi benasitka siku pengajar ti diau betentang jenila enggau Kenari benama David Ford..Daud Kubu as we nicknamed him later in the year..ti seruran ngabas meresa Kenari enggaika penyadi utai tak baka api nyerarai enda alah padamka. Bala kami pom empat pan udah ngelala sida ti deka selalu ngachau ngerau nundi ngeluji, sida pom lima enggau pom enam tinggi. Anang mega saru macha laban semina mimit ari pemaioh mensia ti ngembuan ulah meri teladan baka tu! Yes sireeee..I remember all of you tang laban bala ti udah megai mangku pengawa ti tinggi tinggi di menua hahhahah enggai ga aku nyebut nama or maybe I should..laban there's antu in every so called saint! hahah save that for later lah. Ngenang kaban aku siku ti nyau enchekuk ngeruntuk laban di achuk ba perut baruh dada enggau buku lima laban enggai ngereja utai disuruh seniors ti balat deka ngachau belalai. King ..agi ingat nama sapa sida tu suba kaban? Hmm sampai di gerak urang disuruh bebaris baka askar melayu diraja ba mua dormitory Rajawali!! Ahh sapa ari bala pemacha nemu betanda baka nyamuk? Bala kami disuruh betanda baka nyamuk! Benasit bisi Henry...enti enda kada enda merayap baka baya ngelantar ngelaban madang lalang di belakang Rajawali ngena chawat chap krokodail bala mensia.Tajapan ngasai diri pedis enda nyamai bakatu bisi ga bala kami pom empat tu tadi di bai bala seniors ngelantangka ati sari enggai ba Luak Bay. Engka diatur bala 'Ministers' dikemendarka pengajar kini. Tu meh peluang alai nunu lempuang belalai sebelah selepak batu! Asss apai puas ngelalaika insap. Pemanchal endang bedau dibantaika laban enggaika diri diperinsa lebih agi. Indahnya ga , tak agi meruan ngesuh bau tai di Simanggang udah di 'warning' bala seniors kami ti baru bekalala enggau pangan diri. Nasit aku....

Ari pengawa bakatu meh kitai betunda tunda ngujungka utai betampung bundung nadai pemutus. Bebalas ku jaku ngujungka tundi nyau nyadi dengki laban penyelai kitai mensia siku siku. Bisi bala nya ringat, ransi, enda nyamai ati laban kitai mensia nemu ngasai ngembuan ati ti nemu sinu nemu saru, nemu telih nemu milih, nemu ransi nemu kudi sampaika kitai nyau enda berasai ngibun sempekat besemaia be ila asai deka bebalas dudi hari ila ti deka datai. Ku aku siku, this was very wrong from the get go, but who the hell am I to say so and to judge! Laban utai bakatu ukai semina tau ngelemika tauka ngeringka semengat siku siku tang tau nengelam ngaramka bangkung.. tau nerebaika pulung begasing bepulas uchung! Ari rambai pemansang pengidup, ari pemedis bakatu meh ngempung bala kami pom empat beyond imagination! Tu meh ngeringka buku kengkang tulang belakang bala kami ti dudi nemu bediri enda tumbang. OOOO haaa Selamat Datai tama masuk enselit nyelepit ke Kolej Tun Datu Tuanku Haji Bujang.

Ngemasahka Tunjik Kaki...

Nyau puas bekenangka diri deka nginjau menua baru nyau ga datai maya ngusung tempat palan endur nampung pelajar. Ahhh nyau ga tama pintu penama sekula kelia menya di kumbai urang Tanjung Lobang diatu di kenang enggau nama Kolej Tun Datu Tuanku Haji Bujang. Nyau gining gining merening menua baru baka rusa ti baru masuk kampung tegenung genung baka kijang dipanchar Mujung. Nama meh sekula tu tak dikeliling enggau pukat betali besi ; tak dipagar empat besegi? Nyau kepuas puas bepejahka pemanah menua ti dibaris enggau pine trees nyau ga datai di Kenari! Kenari meh nama tempat ti alai tinduk diau betundi ngansarka kaki tiga ratus enam puluh lima hari, palan entap alai inggap bujang baru dikumbai freshies. Terubah iya meh tu diau kediri idup nengali diau di rumah sekula begulai enggau urang bukai. Kati asai ku munyi tanya dalam ati! Udah nasit udah selatan aku ngasai diri berekat ngempu nasit siku ari seribu diberi peluang bakanya.

Baru datai tak enda nyamai meh asai kitai laban menua nyau lain, mensia pan lain mega. Ahh ku jaku bisi mega urang ngusung, engka tau bekelala enggau sida ngambika nyadi kaling. Tuan bansal Kenari dua iku ti udah nyangkaika diri ba Pom Enam pan manah mega, nemu nyambut penatai serta ngatur penuduk kitai ..Terima Kasih besai Mr. Roland Radu enggau Mr. Wilfred Rogers. Tu meh terubah aku betabi serta betunga mua enggau siti bansa menua Sarawak ti tebilang dikumbai kitai Kelabit. Hmmm ni bala Iban deh? Engka benung di rantau jalai bedau datai kini! Nyau ga betemu enggau siku nembiak, Arthur Mujinil, bansa Kadazan! Pieeee untung meh begulai enggau bansa bukai ku kenang diri ga. Tu meh pun aku bekelala enggau bala kitai Iban ti datai ari St. Augustine, Betong ... Joseph Bunyau , Andrew Blassan Siang.enggau Inyau Bada. Ahh sebilik meh kami sebala deh! Haha datai ga bala nembiak ari Kuching, Sibu enggau Kapit, Zakaria Marzuki, niang Saiful, Dingun, Mustapha, enggau sida bukai mega. Hmmm rami meh tu ku jaku ga. Bala ti udah ngasai diau di rumah sekula nyamai mimit laban udah nyepi pemedis enggau penyamai diau kediri bakanya. Kami ti baru baru bendar meh matih diri nitihka urang deh..mandi nyau beranti anti ahhh sampai bira nyau beranti anti pangan diri laban enda chukup jamban! hahahaha ukai baka di rumah diri empu!! Makai pan nyau di suruh urang bebaris baka bala Sarawak Renjer ti deka nurun ngetan ka antara menua! Bisi dulu bisi dudi ..bala kami endang dudi belama laban ti agi Freshies ku urang. Enti lebih lebih lagi nyau jengkak jengkak bala seniors sekeda..enda semua ..elite minority aja '' hey hey you freshie..apa mauk lebih lebih..ingat terrorkah" Ngenang diri di makai ngena belakang sudu senduk temaga di suruh bala seniors sekeda..tu meh pun penatau bala nembiak sekeda. Lapa bakanya deh? Udah adat saum sempekat ku saut urang! Hmmmm enti kita seniors ila, your turn..bah lah. Nadai ga ngawa ku jaku ga. Udah makai akai daiii nyau gian ngiga semakau enggau betabah! Apoooo laban ti enda berani mansutka diri ari kerubung, nadai ga bala betungkunka insap. Kami duai kaban baru aku Joseph ahh..nyau enda alah tat , nurun ka baruh hmmm angin bau kesing nya nadai dikira deh..alah laban insap. Joe, dini tua suah ngelalaika insap? Hahahaha nobody will ever know! Laban ti ditemu siku dua nginsap, bisi ga seniors ti manah deka nyaga kami ti baru deh. Meri tabi basa serta meri besai terima kasih nuju Roland 'buntu' Umong, Chep Suring enggau Joseclyn Jimmy enggau Edwin Samat ari Kiwi..ehhh semua rumah sekula tak di beri nama burung magang? Ku sida seniors bukai, ..it will get worse before it gets any better.!!!! Aduh parai kitai...Bisi ga bala seniors bukai udah belalai nguji 'ngachau' bala kami bukai maya malam hari tang enda dikibuhka, dititihka aja.

Tu meh pun aku betemu, bekalala ,begulai betundi begagai enggau semua pupu bansa ari semua sukut menua Sarawak ti ampit benasit di anjung urang nyenguk Tanjung Lobang, siti sekula ti endur urang nyimpan ngandang nupi ngerami 'cream of the crops' -amai enda kini nya- ari pom empat ngagai pom enam. Sekula baru menua baru, tuansipol baru benama Adi Badiozaman Tuah, kaling baru..semua adat atur chara baru ulah anak mensia pan beribu macham mayuh leman pan baru! Ahh basah meh tunjik kaki aku tu deh laban ti udah nyingkang namaka diri masuk.