Terebai singgah ba menua matahari angkat...

Selamat betemu baru ba ruai ruang bujang timpang; ba pelabuh nyumbuh anak ampang. Oooo hhaaa ngajihka bala pemacha gerai serta maju bejalaika pengawa besari sari, enda teguyat enda terangkat, puh teguh bepupuh, tan bedindan maya bisi ditichik penguji dunya. Sebedau aku ngerintai seleka dua, dulu aku meri Selamat Taun Baru Dua Ribu Sebelas lalu ngajih ka semua bala pemacha serta enggau bala ti bisi tama mansa ngereda, sangkai beguai ba ruai aki Groovytuai.
Ehhh kemaya deh kala umur aku tu terbai ngenyauh nyauh nya deh! Penerbai geruna panjai tada ti begelar di beri nama Boeing 747 ari penyangkai kapalterbai international Subang ke penyangkai kapalterbai international Narita tu endang sigi pama sepi aki kita gerubi laban penyauh Kuala Lumpur enggau Tokyo. Penat penat enda meh tudah burit mit laban ti tegam bangku tengelam umbas penalam. Berasai enda nyamai meh tudah tubuh muda ditanggam tali pinggang nilon serta dikepit bangku sempit lurus belakang. Penyamai maya tu laban bala mensia ulih angkat ari mua ke belakang enti deka nungkun insap semakau Malaya nyalai empedu enda lama. Aki Gerubi tak benasit laban bulih penuduk ti ending di agihka alai mensia nyalai lempuang. Enda berasai ga udah nya tak nemu muka mulut minta laban ke udah aus… tak minta ai bepupu deka nguji ngasai bakani ku gaya nuntum datas langit beserak remang. Nya ya..nyau angat isi udah nuntum!!!!
Nyau kelama lama ngemeranika diri bejegau kin kitu bejaku berandau enggau bala nembiak West Malaysia kumbai kitai kelia urang Malaya. Pama meh ku jaku bisi tawing bisi kaling enggau berandau ngambika pejalai panjai enda berasai; ngambika pengawa bekelala enggau urang bukai tau ngerembai ulih nyadi cherita kenang sampai tuai. Nyau kepuas puas terebai neresa remang datai ga ba tempat ti di tuju, penyangkai kapal terbai antarabangsa Narita. “Apuuuu tak nyelai meh gamal bala mensia menua tu,” ku tudah aki bejaku dalam ati ngenang diri lalu merening mensia menua nya. Mata sida tu pan nyau baluk baka ti udah nyabak sebulan….Tu meh baka gamal mensia ari menua Jipun deh…”Bansa sida tu meh nyerang menua Borneo maya Perang Dunya Kedua kelia ,” ku jaku diri ga ngenang. Assss apaii , enti baka buah ti tau di pakai nyau ga nanya bakani ku asai buah ke baru dipeda nya hehehehe…
Geginau gegining meh tudah aki bepulas urat pegu malik kiba malik kanan meratika penyelai menua urang lebuh maya mansang nuju hotel ti alai ngeluh endur beteduh sari nya laban pengangkat ke Seattle, Washington tu lagi nyau malam hari. Enti nitihka leka sada sida endu dara burik idung manchung bepetik lunchik tunjik ti deka enggau kami terberai tu endang naka penyauh meh menua ti dituju tudah aki Gerubi . Tak nyau sari enggai meh tu enti kitai deka nikal mulaika pengelama nya ngagai pengelama siang kitai di menua deh. Akai dai nyau bepechah dua meh bala kami ke sama sebilun ari Subang ke Narita tadi laban bisi keda dulu bisi keda nya dudi. Mimit amai meh bala kami tu tinggal ku serbana diri. Akai dai tak salah sangka meh tudah aki tu tadi deh laban teperasa meda bala sekeda tak nyau bebali begari lunggar pinggang; nyau bebuka ayan marik nepan tulang. Seksi sida bala endu tekang gemala menua Malaya tu hahahahhaa..Bisi meh sekeda nya tadi enti, salah haribulan , endang sigi di sangka tau dikumbai lelaki aji rindu nepan….
Bah..mupuk enda lama ..pagila lusa betemu baru..

Mansang Nurun Belelang II.....

Sebedau aku becherita nyapa munyi nyawa, betusun munyi pantun, ngerintai munyi sanggai, dulu aku ngeremi enggau patung lemi nipan lengan nusun tunjuk sepuluh engka buah tangkai leka rintai tak salah di dinga di bacha laban utai ke deka dibantaika nyau jauh nyelai tau nyuruh mata peli peli engkijap enda. Engggaika kita salah sangka enda betanya, salah tangkup salah raup, salah ragum salah panggum , aki gerubi minta ampun ari tapa kaki ngagai punjung pala.
Akai tak sampal ga diri sebilik nyerang lapangan terbang Kuching laban ti deka ngepai meri bye bye, ngeringka semengat ajar tuai nuju aki gerubituai ti deka ngejang bejalai ngagai menua bala ribai. Naka meh pemedis diri deka meleka ngelengka ka pengawa bansa kitai menua tang laban ti udah teleba suah kala ngesan pemedis nyandang pemerinsa nadai ga jalai bukai deh alai kitai nitih ka urang nyingkang sesingkang, sama surut surut undang. “Bakani meh aku tu ila neh.” Ku munyi tanya diri empu dalam ati. Ketuchum ketawa ga aku laban ti ngenang jaku leka serbana bala anak mensia maya sekula ba Tanjung Lobang kelia maya betundi sebelah jalai ngenang utai. “Asal bahgia derita tanggung sendiri,” ku bala sekeda ga.
“Penerbangan kita ke Kuala Lumpur akan mengambil masa satu jam empat puluh lima minit.” ku akih Pilut ke nerebaika bilun MAS pagi nya. Jaku bukai iya enda ingat agi laban maya tu kelia ukai nya deka ninga ka leka lalau leka tesau, ukai nemu nguing limpang mendingka jaku penerang. Berasai enda nyamai ga tudah ati aki gerubi laban ti ngenang diri mansang ngejang nyelat urang. Ahhhh endang baka urang ti belelang enggai kurang meh nya deh. Akai dai..naka ga pemajik gamal bala sida endu stewardess. Apoooo enti baka utai labuh tau dijeput nyau nyeput mimit ngambika enda puni bisi ampit enggau bala sida aya nyambung ngeluit. Sayau meh enda serambau!! Ka ngemeranika diri pan nyau ga enda laban ke suah digelar sida endu sida ibu agi bebau lia. Assss apai tat ke dia meh dulu! Ahhh ka tinduk mejamka mata engka tinduk telenga bebuka mata meh jangka aku laban utai bakanya. Assssapai tak nadai urang enggau manchal! Enti baka ke diatu nyau ga nemu reti kelab Mile High ti ku urang nya. Nyau tak enda berasai nadai kurang pengerindang nyau ga terengkah ba lapangan terbang Subang. Pesan urang ari rumah endang sigi ngambi teksi lalu terus nuju hotel ti dipadahka menyadi tuai aku siku..pieee utai tak tengah pasar tang aki kitai gerubi laban diatu udah tuai nyau enda ingatka nama hotel nya!! Bemalam meh tu dia deh laban ti nganti penerebai diri pagi siti ke Tokyo. Indu utai jauh lemai pan enda ga kurang mayuh ngelambai mai betunga nengali lemai tang meh aki gerubi nemu negu enggai ka puni di pantuk ular sebelah rantau jalai laban pejalai agi panjai. Hahahhaha ku kitai..nama mula!!!
Pagi siti nyau ga ngangauka teksi nyuruh nganjung ngagai lapangan terbang Subang. Tu baru iya..kemaya deh kala ngeluarka diri ari Sarawak menua Malaysia!! Mayuh meh utai ti enda tentu masuk akal maya ti udah terbai masuk remang betuntung langit besambung, meraka tasik begirau gelung. Dalam bilun tak jenuh meh tudah aki gerubi laban ti nadai ngelala urang siku. Di dinga jaku sida bujang sida dayang tu tak nyelai ari jaku ke suah selalu di dinga. Nya meh gaya kitai begulai enggau bala urang Malaya deh tang benasit bisi begulai enggau sekeda bala sida maya ba Kem Batu Lapan enggau bala sida ke bisi enggau ngajar enda lama ba SMK Pending, Kuching.
Begantung dulu cherita laban ti deka mupuk enda lama..
Pagila lusa betemu baru..

Mansang Nurun Belelang I....

“Lusa bekejang meh aku lalu ngajihka dudi hari kitai ulih betemu baru,” ku aki kita Gerubi nelai siku ari kaban ti udah enggau iya begulai sekula ti dikumbai urang mayuh Tanjung Lobang College, Miri ari taun 1980-1983. “Bakani meh gamal kitai tu ilo ahh enti betemu baru. Berapo taun meh pengelamo endo betemu deh,” ku tudah Andrew Blassan Siang nyaut. “Anang lalu lekat bebini ka uhang putih dik! Urang nyuruh belajar anang enda belajar..anang enda ingat ka kami tu,” Patrick Ngindang nambahka jaku tundi tudah Andrew. Aki Gerubi, laban ti sinu gaga lantang sendat nyawa tak terus reretuk nebah gitar ti nyau baka gamal sengayuh repuk buruk enda di kemataka. Tu meh malam ti penudi tudah aki Gerubi duduk beseluar charik betibak chabik tisi jalai mangkang parit besai menua ti dikumbai mensia di menua Kuching tu RPR Batu Kawa. Malik sekali ngenang ke belakang tak nadai utai ulih ga pengawa ti digaga baka bala sida aki Gerubi tu suba tak ngenyangka mata. Nyau udah ngalih anak bulan madahka kami tu tadi malam udah nenak mansau mansang siang. “Udah tengah malam, aram meh kitai mupuk mulaika diri,” ku bala sekeda bebai pulai laban tubuh tak nyau mai gali mejamka mata. “Pagila betemu baru,” ku bala bukai nyaut semadi nyaut.
Datai di rumah tak enggai ga mata pejam entah nama kebuah. Gegaring berunding tekenang ka tudah endu siku ti di kesayauka tinggal di menua. Di dalam ati din endang ngajihka iya nganti pemulai tang leka jaku enda kala di lua, di telan belama. Nadai ngawa laban sapa kitai mensia kala ngesal sebedau utai udah nyadi! Enti kitai mensia tu nemu ngesal dulu, dudi rindu ku kitai deh, engka enda ga kitai tu ngembuan serta nyandang pengidup ke disandang kitai hari kemaya baka ke saritu, enda pia? Minta betanya meh kitai engka enda ulih ga urang nganti kitai laban dunya mansang belama lalu naka meh pemayuh utai ke tau nguji. Enti sema baka utai ti tau di simpan nyau nyimpan iya dalam tajau tujuh taun tujuh bulan tujuh hari ngambika enda ditutu kebari. Budi basa nuan endu endang lumur satu. Enti nyema ka di buai nuan ke tisi jalai, dibiarka nuan ba tebing sungai, di lengka ka nuan di tengah tasik besai, nuan endu endang dikenang sampai ke tuai. Ahhh nyau enda berasai ga malam nyau ga dinihari alai endur mejamka mata.
Nyau berandang utai di luar laban panchar mata panas silau enda enda dipeda laban ke benung begusukka mata. “Ah laun mai nuan dani saritu Bie,” ku tudah Indai nyapa ari bilik besai laban tudah benung besapu ka uras ti dibai bala kami menyadi sari enggai sesuntuk lemai kemari. Nama deh, udah mandi bepisin nunga chermin lalu mupuk meh aku ngusung stesen bas laban ti bisi ati deka betemu enggau bala ba sebelah rumah Elektra Kuching Plaza. Udah bejanji meh bala kami tu lemai kemari. Pieeeee naka pemayuh bala bekerungguk duduk ngembing tangga niki katas kin. Puas duduk nyau ga merayap enselit bebesap nuju dockyard. “Bah nama pengawa tu deh,” ku munyi diri nanya bala narit seput dalam agi. “Am bejalai katas kin, ila lama nuan enda nundi indu tambi,” ku sapa agi enti enda Patrick!! Tudah aki Gerubi tak au mengau aja meh maya tu. Bisi ga urang sepiak tak nemu nyubit ngetil tudah kulit rusuk ti malut kerigai ke nyau deka pansut nya. “Anang guai laban bisi utai di ambi ba Pos Upis din dulu,” ku aku nyaut nyau ingatka bisi utai ti patut digaga sebedau berangkat pagila. Pemanjai cherita enda ulih di rintai deh..nganti ke bekejang meh tudah aki gerubi ti nyau ngira jam….
Mupuk aku enda lama…pagila lusa betemu baru.

Kali ti penudi sebedau pegi.......

Bemain kali penudi:..
Tu meh engka kali penudi bemain bul enggau bala kaban ti udah bisi ampit begulai enggau aki Gerubi di Batu Kawa, ti udah begulai ngajar ba SMK Pending. Apuu nehhh nadai meh ku enggau deh, nadai meh agi enggau bala kita ngensung munyi burung tiong andalka buah tamang raja; ngensung munyi apek busung enda ampit indu dara. Enti kemaya tu aku enggau kita mudik ai USA, Ulu Sungai Apong, tu ila aki gerubi nguji merau mudik ai USA, Ulu Sungai Amerika deh. Lengka ka dia dulu meh jaku tundi kenang bebuti tu tadi. Endang udah ditagaka laban bala pengajar ti enggau bemain mayuh pandai bemain. ..Minggu final PSKPP bagi kesatu tu meh kali penudi aki gerubi bemain bul begulai enggau pengajar ti sama sama ampit ngajar ba SMK Pending, Kuching. Udah nya bisi ga ampit dibai bala bemain piala SADIA lalu bulih lumor dua maya deka ngerami Gawai Dayak 1985. Sebedau nya bisi ga dikangauka bala bemain tujuh sepiak ba menua kaban Bidayuh di batu lapanbelas. Akai tak bemain ari pukul semilan pagi sampai pukul empat lemai..nyau ikak nyau lelak meh asai tubuh tajapan agi rumpah bujang nyelah ngeranah. Tubuh pan nyau madai berasai disepi di asai. Nadai enda ngemuaska diri laban kemaya meh tu ulih enggau bala kaban bemain begulai baru. Benasit nadai MJC alai ngurut tubuh ti madai enda enda asai, alai bekaraoke belagu semina duduk berimbai. Weeeeewwiiittt ku kitai deh.

Gawai ti penudi…
”Aram sanu enggau kami ngabang ke Kampung Semeba,” ku Patrick Ngindang ngangau ka aki gerubi. “Ila lama nuan enda enggau Gawai”. Nama deh, tak nadai bekira dua tiga kali lalu nurun enggau ati gaga laban bisi bala enggau bejegau maya hari rami. “Anang mayuh ulah. Kami tu enggai digagai apai indai urang,” ku tudah indai nyerarat mesan penapat ari dapur laban ti ulih nela ulih meda utai ti tau nyadi sekali engkijapka mata. Pieeee..nyau beteguir bala anak mensia pulai ke rumah. Malam hari siti lalu di bai bala menyadi ngabang nuju menua ti di kumbai urang Merdang Gayam. Jarang lebu ga tudah aki gerubi pama nurun. Ila kemaya meh ulih begitu begini bakatu bakanya agi enti udah belelang jauh nyelat urang. Baka ti ngiga ulih enda ga nya. Pandak jaku, bepansa sekali berimbas enggaika puni enchuki ensepi asai tu nadai ngawa iga. Nya meh ku urang tuai kelia, berani nebang berani ngesan. Tu meh baka randang rembang aki gerubi sebedau pegi betapa sari.

Minggu ti abis penudi aku nengah nujah kali lima pasar Kuching pasar Simanggang. Sempat ga aki gerubi nemuai enda lama ngabas menua ke Undop lalu neresa kaki lima pasar Simanggang. Akai dai..Undop meh ti bisi ampit ngajar aki gerubi bekembuahka lada, betangkalka getah, betungkuka padi, enggau pengawa menua ke bukai mega. Tu meh menua ti betuah bisi nasit mai aki gerubi nemu enggau urang bebubu ngasu beburu. Kada agi meruan kampung jerung ti alai nyumbuh tunggal begagai pagi; alai bujang manchal begigaka bini enti aku pulai nemuai dudi hari! Endang udah masuk akal ga utai bakanya kelia. Nadai ku enggau meh enti sema enda ampit meda kayu rebah menua berubah. Mayuh mega bala ti serambau begulai sekula enggau betemu alai ulih betabi meri jaku goodbye ku ribai selamat bejalai ku kitai, saum penyiru beberi jaku selamat tinggal pagila lusa kitai betemu baru enti umur panjai nadai apa nadai nama. Nadai ku enggau meh laban udah nasit di beri petara. Bisi bala sekeda jauh pejalai lalu bisi ga bala sekeda jauh pejalai dalam mimpi tengahari bakanya aja…..

Mupuk aku, enda lama……pagila lusa kitai betemu baru, enda pia?

Jalai tebuka pintu telenga...

Kiraka mutus ati meh tudah aki kita Gerubi nemuai ngusung menua ti seruran dibacha dalam berita menua kemaya; menua ti suah di dinga tampak rita benama Merika. Bala sida ibu aya, sida indai ga berat rat mesan enda nyuruh bekayuh ngepit sengayuh bangkung kajang; enda nyagi pegi mansa padang bansa Colony enggaika lepi dudi hari tinggal rangkang. “Enti danjung ke menua Landan, iya tu sigi pelir dibai mansang pelir meh dibai pulai laban pengeka iya bemain bul,” ku bala sekeda ga betelai belalai ngumbai aki gerubituai tak tuli menuli enda ninga retik singkang langkah kijang, enda ninga kebap sayap burung kenyalang. Nama mula neh laban ti enda nemu pulai melangkan sebelah lupak tengah padang. Ehh ku kitai, sigi endang udah masuk runding ga pengawa main bul tu kelia nyemaka di anjung sida ibu aya enggau indai nemuai neresa menua Landan, Ai Ngelan ahh..Nama penyalah deh..laban kaki tak agi lempung lanchat engkelung melit ngeluit pun bungkung; tak agi regas agi bagas ngelunjak lepung. Oooo ha nya iya-pama nyaut munyi nya tak lalu munchung setanjung mulut bala mensia. Urang tuai ukai nya tau dipadahka utai sengapa deh. Tak berenaing taing taing ulih didinga sekayu tinting leka jaku enda tau mali anang tu tadi didinga tama mansa lubang pending telinga mensia laban enggaika kitai anak nembiak nadai pemandai seruran pungkang. Enggaika kitai tu tadi tak nadai diguna di kumbai urang ngemenuhka dunya. Nadai ga aki gerubi tak ngelingkang nyakang ka numbangka leka sembur jaku atur leka putar jaku ajar urang tuai.

Lengka ke dulu meh pengawa ti deka enggau urang bekerja makai gaji. Jacksonville State University here I come. “Nama meh utai ti dikumbai urang Visa tu deh,” ku aku ngenang balas urang ti nyuruh begagaka utai dikena masuk sekula baru. Enti baka diatu tak dikumbai aki gerubi wang ringgit duit pelastik kredit kena saritu bebayar pagila lusa dudi hari. Tu meh siti ari peminta urang menua nya laban enti nadai nya sigi enda ulih enggau urang belajar macha belajar ngira masuk sekula kali ketiga. Nasit ga bisi dirintai bakani jalai ngambika enda tesat enda tepampat. Akai dai..ka pan enda engkakai tepenat pedis jari angkat duduk bediri ngisi pom. Ni alah tak duduk bungkuk baka chengkuk buntak tayuk betaipka utai deh! Tu endang sigi berasai tulang belakang nyau terit tendur baka bengkung bubu jarang laban ti udah berasai lama enda apus engketu engkutung ngeremi gali enda berupai. Ahh enda lama agi meh asai tu alai ngangkatka diri berenang ngiga lubang, belelang ngiga sarang; nginti begigaka baur, enselur begigaka endur. Di tagaka udah chukup meh surat lambar kertas di kena nurun belelang.

Akai dai laban ti udah mutus ati deka ngindik menua ribai, ditinggal dilengka ke dulu meh pengawa bukai. Pagila lusa maya bisi ayan datai nyenguk nampung iya baru deh..Bejalai kulu ngindik batu; bejalai kili nengah ai meh tudah aki gerubi tu tadi mai ati gaga…Asss apai, tak berasai ga tudah aki gerubi berani ngijapka mata nyeling indu china. Apuuu neh, tak hitam manis chelum lis ga gamal tudah endu siku tu peda mata. Ni enda ati tekuing sekali nyeling deh. Jarang ga meda kulit bansa sida tu bakatu, pama enda kuning lensat endang tak burak baka taya. "Anang ngachau anak urang," ku sida sebuat ti bisi enggau aki gerubi nyukat pasar Kuching maya tu. Danu urang pan enda meh mereti jaku sida nya ti nyau kekuchau munyi semalau mandi lemai. Tang jangka aku enda ga bala sida endu nganu laban tak ngemeranika diri nemu ngaling mai betawing. Teperindang semadi ngenang aja meh nya laban munyi ku ribai, accident!! Sida endun dara menua pan udah ga abis peresa alai ulih datai nemuai ngusung meri goodbye ti ku kitai. Appooo neh endun, dia meh alai tua betemu belalai belala begulai beserara enda lama neh. Agi bediri chechegi dipansa tiap hari nya deh indai endu wai sanu.

Mupuk enda lama meh aku sekali tu…ila betemu baru.

Randang Pendiau III.....

Selamat betemu baru dalam karang kenang randang pendiau urang bujang ketiga sekali tu. Engka meh ati tu bedau nemu kini tuku; bedau mutus kini tuju. Nadai kala dek apai diberi urang jalai ulih milih; bepampang tesat titih. Oklahoma sounds good for now. Akai dai..”kada enda ngesal tu ila,” ku tudah diri bejaku kediri berandau nengali. Enti nitihka ati sigi meh aku tu nampung pelajar tinggi ke agi laban nyau berasai enda nyamai ga di tinggalka bala kaban serambau sekula ti nyau mengenyau nampung pelajar sebelah seberai semenanjung Malaysia, menua chelap selju putih utara Canada enggau menua Amerika tampak rita. Hmmm bisi ga bala keda nemuai kebaruh nuju menua Setrulia ti ku sida niang ini kelia. Hmmm nyau ga datai surat ari seberai madahka diri enda bulih masuk University Malaya. Nadai ngawa ga deh enti kita bangat enggai nerima. Ambi terima anchau ka tikai enggau ngambat penatai sida bukai nya meh.
Kelimpah ari ti berundingka penguing diri, bisi ga hari maya betulungka pangan diri. Tudah kaban aku siku pan nadai ga diterima sida ari seberai nyin…apooooo..ukai baka kita diatu deh dom igat bujang anggat; ukai baka kemaya hari tu kami kelia deh endun endu dara rejat. Diatu tak melunggit bejugit nepan ensikal jalai sempit datai meh ba tempat ke dikumbai urang Universiti alai bulih ketupi ngelindak besegi nya. “Jom sanu, ngantar aku interview kejap,” ku tudah kaban aku siku ti selalu mansutka batang idung iya ari Kampung Pueh, Sematan. “Ko interview sine tok,” ku aku nyaut. “Eeeee kat Simpang Tiga sia bah. Abis interview kelak kita nyerabut kat All Joy,” ku tudah kaban aku siku nya. “Kelak call Julai mun dah abis,” ku aku. Nyau meh kami duai iya deh derut derut mansang enda surut. Dini deh nemu utai ti bekaki empat ningkap ngerayap baka Kancil deh!! Proton ti ku urang nya ga huh..kada udah dalam kandung perogerim menua! Enggi kami hahhaha Have Honda Cup Will Travel deh kelia. Nemu nya tudah kaban interview deka nyadi pegawai kastam. Nya iya ku dalam ati aku din..udah ga nyadi kepala nyelalaika penatai sahip ari Indonesia..ulih nyadi tuan kastam iya nya??? Hahhaha nya meh kaban kami siku ti sama serambau begulai sekula benama Apin Pauzan.
Hari beganti hari ga aku berunding ka kuing tuju pejalai; puang nadai penatai. BLTC better known as Batu Lintang Training College ba Jalan College..bisi nembiak ngumbai nya Jalan “Kollegee” meda sepiling tak munyi nya..enggai ga nerima. Bangat tai mensia dibaruh hari tu meh tudah aku tu neh. Tak baru deka enggau urang belanda ngelendatka stadium baru menua datai ga surat siti ti madahka tak bulih tempat alai endur nampung pelajar enggau sekulasip sama sekali. Apoo ku dalam ati nanya diri, “Nama mimpi demalam.” Asai tak bemimpi tengahari lelap engkijap udah dani meh nya kini. “Engka sida tu bisi salah tulis kini,” ku aku ga serbana. Engka pinsil pandak udah ditetak enda di ansah; pinsil panjai udah ngetak seruran basah ti dikena sida tu. Enti tu nyadi ila apoo naka penyauh pejalai tu ngerembang remang langit mingkai; ngelangkah tasik enda nyangkai, ngelaungka gunung mayuh tuchung; mansa paya menua Chantung. Mayuh meh utai ti tau nyuruh tegenung sinu ngenang; tegepang rebah telentang enti duduk kediri ngenang utai ti tau nyadi enggau utai ke bukai mega…….
Bah nyurutka diri undur ngeremi..mupuk aku, enda lama..

Randang Pendiau II....

Aasssss apaiii engka bisi meh urang nemu kasihka anak ampang ijau jegalang; bujang manchal pemechal tusu sintal dara kumang. Akai dai..tak enda berasai ga tudah aki Gerubi nengkadah malikka langit puang laban ti ngenang nasit diri udah ulih tau enggau urang ngetanka menua berambunka nyawa napi peluru leka senapang masuk nyadi soldadu Tentera Udara DiRaja Malaysia. Tinggal meh nuan sulu ambai kunsi seribu mata; tinggal meh wai dara jawai ambai saum sekayu menua. Sabar meh nganti pemulai aku ti endang di temu datai setaun dua. Beserara enda lama meh kitai tu deh wai. Tu meh gaya asai ati ti udah nemu ketawa laban ti udah lama pedis telih di bai nyabak enda diterima kin kitu. “OOoooooOO ha nya iya , “ ku munyi diri berandau nengali. Nyamai serta lantang ga mejamka mata nindukka diri laban sejai jai ulih meh enggau urang nyerauh beguruh enggau TUDM.
Bah lah..tak berasai malas ga dani pagi deka nurun ngajar nembiak pom three ilmu alam ku sida bala Melaya Semenanjung Malaysia; geography ku kami . Kemaya meh aku madahka tudah Tuansipol SMK Pending neh? Enggai nyadi ga kitai tak tumu meleka baka buah mansau rarah inggar; baka dan patah tingkar. Nadai ga ngawa iga laban bisi dua bulan lunggar sebedau masuk terining. Baru meh tudah aki Gerubi deka nyeput ngenyangka perut tengahari bulan tiga endur alai mutusikal tak nyau rerauh ngeput mengeput ngangau baka ti enda ampit minyak di luar pagar pintu penama.” Apooo nama gaga tudah aya postman tu neh,” ku kenang diri. “Baru ka makai tengahari kami tu aya. Nama utai deh…,” ku aku ga enggai enda nyapa betanya enggaika tudah tuai tak bisi pemedis! “Bisi surat nuju sanu ti enda tau enda dambi ngena tandajari,” ku iya ga nyaut aku. “Au meh..tu aku nyain,” ku aki Gerubi kita laban nemu nya surat ditujuka ngagai iya deh. Akai, ku dalam ati berunding lalu meratika stamp sida nya. Pama penyauh ga burung achang tu terebai ngerenchah langit meraka tasik besai jauh pejalai mai surat ngagai pulau Borneo! Di kumbai bungai raya bungai Malaysia ukai ga gambar stamp sida tu suba. Tak bisi chop Columbus, Ohio ..”hmmm engka tu meh menua ti di temu diperimba Christopher Columbus kini,” ku aki Gerubi iran ati meda chop nyelai bakanya. “Ari ni nya B,” ku tudah aunty aku nanya! “Ahh lagi muka pama bisi maya lunggar ba sekula,” ku tudah B nyaut. Nyau beguai ga tudah aku nurun laban jam nyau ngeluah mimit alai ngebuka diri mansa jalai rumah sida Nasib Teruna ngelayang ke sepiak SMK Pending kin.
Nama deh, tak naka pengaga meh ati. Berasai pandak ga hari saritu. Surat lalu ga enda dibuka laban pengagit ati ti deka besipakka buah bul enggau bala diri serambau enggau sekaban ba Batu Kawa. Ukai nya tau tinggal deh. Enti enggi urang mansang sekerat, enggi aki Gerubi maya tu kelia mendua meniga kerat deh mansang pama bala bisi nyebut buah bul. Akai..kasih ga tudah gulikipa kami maya nya, Frankie Stephen Agih, di timbak enggau buah bul sais lima. Yeahh..some of them guys went on to play for “Ngap Sayot” . Nyau salah kelala lemai nya baru mulaika diri ari padang. Udah bebela lemai baru macha surat ti di terima. Yes….bulih ga tempat ba Ohio State University. Surat siti ti ari Stillwater, OK pan madahka bulih ga tempat….apuuuuu nemu meh urang kasih ka bala anak Iban ti ngelama lama tu dikumbai urang timpang anak ampang. Bah lah ukai kitai tu anak urang kaya raja beduit mayuh reta! Dini bulih duit dikena melanja sekula, enti nyemaka nampung pelajar baru? MARA udah enggai meri! Enti nganti sida tabung aki selumbi kaki nyingkang; aki sebiji gigi rabang sigi nadai jalai deh. Now, TUDM, Ohio State University enggau Oklahoma State University, Stillwater ti dikira dalam runding. What must I do? Nama meh utai ti patut di pajuka?
Mupuk aku..enda lama. Ila betemu baru kitai.

Ngerandang Jalai Pendiau............

Ngerandang jalai kediri....

Nyema ka diri ti imun diau diri enda luchak tengan laman enda kamah jari lengan engka meh pendiau enda ligau ligau tebasau jam rugi belama. Benasit ka diri ti bisi pemanchal berani mechal penguji dunya meh alai pendiau tak enda berunding dua tiga kali ngerembang ngerandang jalai repa penampung nyawa. Nya lapa deh ku tudah kenang diri maya ti nenggau tandan tangkai bungai buah penyamai. Engka bakatu magang meh kitai mensia ngenang serta berunding maya kitai udah tepanggai ba umur alai bekuing merening ngiching niki tangga belubah nyingkang tu. "Uji ti enda menyati diri, likun pendiau belajar memanah tu tadi, nadai nuan kapa kapa," ku bala sida apai, sida indai, bala ibu aya. Pengasih mensia ke kitai meh pama urang nyau nemu beserebana bekenang ngira pengawa kitai pagi siti lemai kemari.

Ngerandang jalai pendiau serta enggau pengidup kediri tu ukai pengawa ti lempung nyamai di san baka ngesan pelai pelapung ginti ti ku urang deh. Nya meh laban penimpang ari mit nemu nyungkit tinga raja; penimpang ari mit berani ngerupit buah dada. Laban kesatu entap baka ugap raja menua; nadai apai sumpah petara. Enggai pan tudah aki gerubi tu tadi nginsit nyau meh betelansat ngidupka nyawa. " Bee, ku tudah aya aku siku maya tu. Uji nuan meri aku saptiket ti ku sida niang ini kelia...meda baka meh." Nadai ga tudah aki gerubi bangat nagang deh! "Nganti aku ngumpul laban agi meruan betemambur dalam bilik din," ku saut ga. Nemu aja meh kitai pama bilik ti dikumbai bilik urang bujang ahhhh lembau aku nyebut deh..betemambur utai ayan becherayan ba geladak lantai penawan. Ahhh kapa bangat ngenchadika kengka saptiket nya..ukai nama nya deh, semina kertas besegi beleka minta puji aja deh utai nya.
Aki gerubi pan lalu bakanya ga betaipka surat betanya bepinta enggau mesin typewriter made in China maya pun perang Jipun dunya kedua kelia. Nama deh..nyau leligau ngiga abc sebelah nya..tak nyempelah ga sida China tu ku ati aku..nama kebuah kitai belajar abc di sekula tak seripih serintai serarih..enggi sida tu nyau ulih ngiga betatuk munyi tabuh leka lagu serbana dungai sida aya? Nyepil nama diri pan nyau pejam pejit baka empeliau bejalai singit ngiga letter ti ku ribai. Ni deh utai di taip nemu abis! Pupuk belubah manah jamah meh tu kelia..

Ahh ku kitai nyau udah sebulan nandan di langit setaun nampun di bukit tak datai ga balas urang deh. Tu meh maya aku nyambut hari pengada masuk umur bujang enda chechalang; umur mali surut bejalai mansang; umur ti dikumbai kitai 'barang sapa ngetan sapa ditundan' ..darah muda bekalih nyadi darah isin , lari kita endu enti enggai alai bepusin deh. "Bee, ditu tua duduk..ba luar tu," ku tudah aya aku nya tadi. Laban ti diau enggau sida deh..ka pan enda nitih ningaka jaku pesan kangau urang. "Nama deh? Tumu amai ga? Sapa ti enggau tua bemain badminton dia deh," ku tudah aki Gerubi nanya laban ngelama lama tu pama di kangau bisi meh nya "family cup" bemain badminton sesama diri sebilik. "Pagila nuan nurun enggau aku ke Satok kin," ku tudah aya nya madah. " Nama pengawa tua deh? " ku aku ga hmmmm ukai nemu utai deh..nemu pia pia meh. "Aku nganjung nuan interview," ku iya. Nyau lelengap ga tudah aku .."nama pengawa nya deh aba?" ku aku ga nanya. Aku au belau aja meh maya tu kelia..sepemai urang. "Kati ku baka neh enti masuk TUDM megai pangkat Leftenan Muda..bisi amai nya," ku iya madah ke aku ti lalu rerangap enda sempat tedataika leka jaku balas....Besambung baru maya bisi lunggar jam ...ari chukir aki Gerubi........

Pengawa Sekali Ngelansa II......

Meri selamat taun baru nuju bala pemacha karang kenang aki gerubi bujang Simanggang. Nya lapa deh..naka pengelama meh aki tu udah enda kiruh baka bekeritukka ngarang cherita rintai ripih pejalai dataika tuai. Baka ti tekait tetugam jangkam mua; baka ti nadai ayan seruran betundi nadai leka. Bah lah, aram meh kitai nginsit belubah lubah masau jam muai masa.

Tak enda berasai ga ngayunka singkang belawa belanda begagai berebutka buah bul ti meruan segala ba padang ti benung belengkap langgung enda rata ba mua sekula SMK Stampin maya tu kelia. "Nama meh kita tu bangat tak nyau sengah sengah enda tan seput, alah jamah kami ti tuai," ku tudah Jonathan Nanang maya kami berenti belelak udah tembu babak pertama. "Lu olang kuat melokok...minum pun suka suka mana tahang," ku tudah saut Sumping china gila ga laban ti ngasaika bala tak agi ngetatka palu butul stout carlsberg lemai kemari ba ehhhh nama penama kedai nya ba Batu Lintang dia neh. Assss enti bisi pil kuda pama ga agi hahaha. Tajapan bakanya, nadai ga ati irau laban tudah Jukah Panau enggau Samsuddin Hassan sempat ngambi peluang di jarang kurang. Menang sekali, menang ba padang St. Joe, ba padang Matang enggau padang Jubilee udah nya nyau ga kami sebala ampit enggau berebutka mangkuk ba ...hmmm baru amai ga stadium tu suba deh..nganti padang Jubilee kenu ku jaku kenang bala mensia di seberai din. Bala pengajar ari menua Bau-Lundu meh ti enggau besatup ba "Final" maya tu. Yesssssss we menanggggg by 6-1!!! Nyau betegaring bala kami sebala laban ti hahaha engka kelalu ikak lelak kini nya or butul butul butul...laban sebedau bemain udah nuntum bala sekeda.
Nyau tekenyit aku tudah aku laban maya nerima perais nyau besatup mata betentang mua enggau siku mensia ti ampit ngajar aku di Tanjung Lobang. Nama deh agi ketuchum ketawa meh tudah aki gerubi lalu nyampaika jaku seleka dua. "XXXXXXXXXXX koo, jumpa jua ngan kitak tok ehhh," ku tudah aku nyau enda berasai laban ti ngenang iya siku ari sida dua iku ti mati idup deka muai aki gerubi ari asrama enggau sekula sesama sekali. Asss apaiiii udah ga di sembur bala ba Batu Tiga dia tudah ini siku tu...engka enda jera kini. Hmmmm nya meh ulah ti enda tau ditunda nembiak kemaya laban nadai mai penguntung tang tau mai pemedis udah abis belajar, udah abis sekula. She was none other than Siti Khatijah, sapit tuansipol Tanjung Lobang sebedau nerengkahka diri ba Kuching. Ahhh tak nadai kala didinga agi meh tudah ini; ke penudi tu tadi bisi ga bala kaban serambau sekula kelia madah udah nyandang pangkat Doctor(Dr)...

Kelimpah ari pengawa bemain enggau segau segau enda nitihka maya tu kelia bisi ga ati deka nitihka bala serambau laban meda bala tak nyau mengenyau nadai dayau kemayang tunsang ninggalka menua. Bisi nya masuk Universiti Malaya; bisi mega bala masuk UKM, ITM, USM, enggau sekula pelajar tinggi ti bukai mega..Nyau tinggal dua tiga meh bala ti suah begempuru sebelah rumah elektra, Kuching Plaza enggau Wisma. Bah lah ku bala keda..berunding meh. Bisi sekeda nya nyau dikangauka interview kin kitu deka bekerja. Lapa deh enda bepinta enggau urang..ngeruh ai ku jaku; anang enda..bah nama deh? Pama nerima surat balas endang udah nemu saut urang deh...enti dirintai pemanjai engka apus rantau sekayu jalai Kuching-Simanggang nya. Tak di balas enggau jaku ti bepunka "Dengan dukacita nya...bla bla bla" belama deh. Assss engka ari pemanchal nyeligih enda bulih tu tadi meh tudah aku tetemuka utia ti patut di kerja. Tak ngerijista diri ngambi peresa English A level tang meh ari semua menua ti bisi, tak Simanggang ga di pilih alai beperesa. Engkechit enda ga lama ke Simanggang mansang pagi pulai lemai..pama diri ga RXS nya kelia deh. Ngerijista diri ngambi single subject ti ku urang meh tudah aki gerubi kelia...Entah nama meh utai ti kumbai urang single subject laban ti enda datai masuk peresa..enda ampit haha ukai enggai!

Mupuk aku enda lama...ila nyambung ..Selamat Taun Baru.

Pengawa Sekali Ngelansa....

Pengawa pagi.....
Tumu mega tudah aki gerubi dani enda salah salah baka ti ngerumban basah embun pagi nurun ari Batu Kawa muntang ngelampat ari jalai Ong Tiang Swee lalu mechut derut derut mansang nuju SMK Pending. Nama agi deh kelia, pama udah datai ari sepiak ngalih ke sepiak Simpang Tiga ti dikeluluka bala..nyau deh katas kin. Semadi nganti maya meh bala kami sebuat betunga berandau enggau pangan diri....nama agi deh laban bala ti pama pama tajapan Pengajar ku jaku. Tu meh maya aki gerubi bekelala enggau Abang Patdeli Abang Muhi, Ronnie Boniface, Jukah Panau, Abdul Kadir, Samsuddin Hassan, Abdul Razak Ismail, Nasir, to name a few meh nya. Tu mega maya aki gerubi betabi dua kali enggau siku pengajar ti udah ampit ngajar bala kami maya aku agi duduk rerungguk ba bangku sekula, Mr. Ong Siang Pau! Ahhh nyau kepuas puas betabi basa bekumbai selamat pagi cikgu good morning sir tu tadi, enda ga berasai nyebut madahka tudah tuai iya sapa ti ngereja ngukir entuka tudah iya kelia nyadi batik Malaysia. "Really?" ku tudah kasih laban ti enda nyangka. "I thought it was the work of you lower sixth students lah," ku tudah nambah pepesap mata. "How you know ah?" ku iya nanya baru. Tudah aki gerubi tak ketuchum enda nyaut agi lalu angkat ari bangku panjai laban ti udah maya masuk betunga enggau bala anak nembiak. Tak lempung asai dada laban enggai agi disangka nadai betanda baka kelia...Pama nama udah jai ukai ulih ditikalka agi deh. Seminit aja deh ngereja enti ka ngiga penyai ; sepemanjai umur kitai idup mulaika diri ngiga pemanah. Nya lagi pan kadang kadang enda datai ba adan.

Pejalai lemai...
Pama udah nudukka diri sejam dua di rumah nyau deh "beganjuh" baru. Laban tubuh muruh benung rumpah nyamai dikenang nadai urang nagang. Ahhh ukai bejalai sengapa pejalai deh aki gerubi laban..tak enggai nyadi enda..laban ti udah di suruh ngemataka nembiak belatih. Au meh nama mula..semadi nadai aja meh nya. hmmmm nama tu suba neh..ngatur dua tiga iku nembiak long jump enggau triple jump! Akai dai..kemaya meh kala enggau urang merejuk kejingka baka kijang dek apai. Asss apai urang ga nyuruh kati ku baka deh, ngaminka ngapa meh. The lad turned out to a very good triple jumper and of course a long jumper. Nama agi pama udah ngelengka ka pengawa nya, nyahh din alai tudah aki gerubi enggau urang ngelendatka padang. Rumput teka di reda; rumput malu di tumpu; madang lalang di rembang. Nasit mega tuansipol sekula maya nya kelia ngeransing ka peneka bemain diri iya empu mega bemain bul. Udah ga bala, akai daiiii pama belelak mimit sigi nyau lelepu nepuk pangan enggau asap semakau Malaysia. Enti lemai salah kelala ku kitai sigi tau di kumbai indu sempepat deh. Ahh ku bala besemaya enggau pangan diri..tu meh maya alai bala kitai ngerigang diri..ba padang bul. Tak tau magang mega bala bemain..dua tiga iku pengajar bansa China ti datai ari utara Malaysia begulai enggau empat lima iku bala West Malaysia bekaling enggau bala ari pulau Borneo. "Sumping" China Kuching nya tak nyempelah mega..kaki kerusi bangku raja enggai meh enda enggau!! Yeappp udah chukup lelak nyau ga bala ngerumban kedai sebelah Batu Lintang dia ngichaka ampit sebutul dua bedau mulaika diri ke rumah! Ukai nama deh bala sekeda sigi ngipa ku jaku..bisi amai ga sida MPBL tu kelia dikenchadika bala. Sekali bepansa berimbas bau besatup kuyu; bepaut jari beluit kaki nadai nya ngawa iga ku jaku bala keda deh. Abang nama disebut agi deh..tiga depa isi mansang ..nyau gegitik tudah pama datai angin ari Simunjan!

PSKPP.....besambung enda lama agi...mupuk enda lama aku.

Bekelala enggau reti leka jaku "Pengajar".....

Hari beganti hari, minggu beganti minggu, bulan beganti bulan udah megai pangkat tuat tungkat nyelai amat ti dikumbai "pengajar" tu nyau ga berasai bekalih sedih sinu ati laban maya agi di bangku sekula enda tentu nemu pemesai pegai rangkap pemanggai jaku pengajar. Maya ba bangku sekula kelia deh, pengajar tu semina bala anak mensia benasit bulih duit makai gaji diberi perintah menua. Malik ke belakang tak berasai sinu ga tudah aku laban ti ngelaban jaku suruh bungai tujuh seribu laku sida miss mister sir madam cikgi cikgu.

Ahhh ukai meh sida tu deh tak semina rah rah bejaku kamah; tak bediri chegi chegi depan mua ngeluluka perang dunya kedua history sejarah mensia. Ari kiba sida ibu aya tu tadi deka bekunsika utai ti udah ditemu ngambika bujang dara nembiak dudi tau pas peresa bulih pangkat satu ngambika sida iya tau pandai nyadi menteri megai menua. Magi meri penemu ngichaka sida bala nembiak ti rerangap jejengap tau nyenguk universiti Malaya. Ehhh enda ka tebelenga kembai idung bejalai enda chundung enda nukung sida apai indai kita dom igat endun endat gatal lusong! Tu meh asai iya deh! Bah lah ku bala nanya. Nama nya tak ari kiba aja deh? Anang guai belubah ngerintai meh kitai laban lemai tu agi muda panjai pejalai. Ari kanan bala pengajar tu tadi endang baka kitai mega. Bekerja laban ikunumik madah supply enggau demand tu enda tau meranggang ari simpang bepampang betemu janga. Siti ari pengawa ti tau meri penatai nyuruh nyamai ngidupka diri enggau bini anak. Ches wes yes no no different ku apai saloi deh ari apai indai kitai ti begiga ngasu beburu besari sari. Ulah telatah pan baka enggi kitai nya meh. Pejalai pengidup enda ngetu semadi seput padam deh. Bah nyau ga tudah aku nyaut tanya dulu kelia hahaa..laban ti naka pemanchal sebarang embal ..bakatu bakanya meh tuju pengajar ti ngerara nganu ngukum laban nyau ngasaika diri nyau nemu nganu ngukum musil pending anak sekula ti enda ninga enggai macha. "Jangan macam ya Cikgu..sporting lah sikit," ku serbana bala anak mensia ngeruntuk minta kasih ari tudah aku. Click click..apooo ku dalam ati din "munyi tu meh aku kelia deh laban malas" lalu danu pengajar minta kasih ngambika enda di ukum!

..mupuk enda lama aku.

Tengggau Kalih Pendiau...

Enda berasai mega pendiau bekalih maya ti udah di kangauka anak sekula "Cikgu". Asai ka agi bemimpi meh tudah aku tu tadi laban agi tekenangka maya diri empu agi dedunga mendingka licha ajar pengajar maya agi di bangku sekula. Mendingka licha ajar pengajar??? Hmmmm nyau nyelai asai munyi laban ti ngasaika diri jarang muka pending ti enda ridau tu mendingka licha pengajar tu kemari. Nyau ga berunding dua tiga kali bakani deka nyuruh bala anak sekula di deka di ajar tu tadi mendingka aku! Ahhh ku jaku nadai tu beleman seribu macham deh..

"Selamat pagi Cikgu," tu meh munyi tabibasa anak nembiak ti deka di ajar tiap kali masuk ke bilik alai belajar. "Dalam ati din kada enda ngelesey nyumpah aku bala sekeda sida tu," ku aku ga muchau ngerichau dalam ati laban udah ngasai diri kelia ti bisi udah beperangai bakatu. Ahhh muntang deh enti enggi aku kelia. "Dalam kelas tu aku meh pengajar kita. Enti betemu di luar sebelah pasar di luar pagar sekula, aku tu meh siku ari kaban pangan kita ti tau alai bepinta betanya maya bisi tesangkut tetungkam teterap nama nama," ku aku nerangka juluk ati bekaul enggau nembiak. "Betulkah ya Cikgu?" entah enda ingatka nama nembiak Sungai Apong ti nanya munyi tu kelia. Mayuh meh macham utai ditanya nembiak maya hari betemu bekelala ti terubah iya enggau sida. Lantang ga asai laban udah nerangka diri bakatu. Manchal bakatu bakanya meh nembiak, enda salah salah baka diri empu ti agi ba bangku sekula kelia, tang laban ti udah ngayuhka perau serta udah ngasai diri tengelam pansut tepanggai anyut nemu mimit ga ngelimpang serta nguingka luan enggi sida ti ajar. Tu meh siti ari "penguntung" diri empu laban ti udah ngasai di kenggaika, di buai baka ampa nadai beguna maya sekula kelia. "Udah ngasai lapa enda nemu beratika serta ngelimpangka," ku kenang dalam ati. Bisi ga bala pengajar ti baru ti enda nemu ulu ili lalu terangap rangap maya betempuh enggau ulah nembiak di ajar sida iya ti enda tentu menyana laban diri empu ga enda kala ngasai ala good boy miss good two shoes maya sekula kelia.

Kur semengat enda kala sekumbang nyadi pengajar tu suba bekelukih chechengih maya besatup enggau nembiak ti mayuh ulah laban kesatu udah ngasai enggau kedua laban ajar serta chara ngerara ngajar bala pengajar ti ngajar aku kelia enda bisa enda didingaka. Engka meh sida iya mimit ngait nitihka ajar pengajar sida iya dulu kelia serta engka meh sida iya dilatih ngajar serta ngukum nembiak bakanya ba Maktab Perguruan sepuluh tahun ti udah kini. Enda meh nanya pemayuh pengerindang serta pengachau sida iya dulu kelia. Engka sida pengajar ti udah bulih Degree bisa taji tu nitihka ajar bup psychology ba Universiti kini. Ari kedua tu meh aku nukar chara diri ngambika nyelai ngichaka bala nembiak tau ninga. Nama kebuah? Laban mayuh ari ti mimit utai ti ditagang maya sekula nya common sense ku ribai lalu it took common sense approach meh nyatup iya, enda pia? Apoooo tekenyit aku ehh laban 9 ari 10 nembiak ti mayuh ulah maya tu suba nemu nukung berani ninga. Ukum sigi enda tentu ngasi laban udah ngasai serta meratika bala mensia ti di ukum pengajar kelia. Mangkin berat agi di ukum mangkin niki agi darah deka ngelaban. Nadai meh lebih ari jaku ajar ti nyagu mekit sida iya ba pelajar deh, enda ngemaruhka sida iya nadai bebasa. Ahhh tudah Abang Padelli enggau Abdul Kadir pan bakanya mega!! Pantang aku ti udah ngasai meh tu..enda tau sekali kali ngemaluka serta ngemaruhka nembiak ti nyelai ulah maya sida iya agi biak ba bangku sekula. Chara serta jalai aku tu kelia, enti baka kemaya hari tu, sigi meh enda ulih dipajakka laban dunya ga nyau jauh berubah pengelimpang enggau pengerindang nyau majak betambah, enda pia iya pemacha?

Bekalih pendiau enggau pengidup...

Sebulan dua udah datai di Kuching nyadi penganggur , nyadi apek bayat bejalai kin kitu nadai temu nadai tuju enda menuku meh tudah aku. Nyau mega puas nyukat pasar kedai India pemesai padang merdeka. Nyau ulih itung ari puak kiba ngagai sepiak kanan berapa sinkang pemanjai padang merdeka laban ti di tujah besari sari enda milih lemai ditampung pagi. Bas lumur tiga pan nyau meh leju ngundan bala raban anak Iban ke benung pemutus peresa.

Enda mukai mukai lemai saritu tak bisi temuai ngusung. Akai daiii ku jaku dalam ati, " Tu sigi bendar ninga jaku ajar urang lagi". Ka pan enda kediri berandau nengali bakatu laban udah ditemu bagak deh! Iya ga benung dibalut latak kulit nyau baka tanah luchak ga gamal baru pulai main bul enggau bala. "Mansa enda lama. Nama berita kita deh Uncle," tu meh rauh aku nyada munyi aku nyapa. "Mandi meh nuan dulu...udah mandi duduk kitu," ku urang ga nyaut. Berasai lantang ati laban hmmm nadai meh nya danu urang!! "Nama enda utai ti deka dikerandauka sida tu enggau aku," ku aku ga nanya diri empu. Udah mandi nyau meh tudah aku junuk junuk lalu ngenudukka diri di tisi. "Nemu main bul nuan pia?" ku tudah tuai nanya. " Mimit mimit aja," ku aku ga nyaut lalu merening bala urang tuai masang mua lalu ketuchum. "Nuan deka nyadi temporary teacher?" ku tudah tuai nanya. Nadai meh aku tesautka diri laban nyau tekenyit ..akai daiii ngajar nembiak sekula urang ti naka pemanchal baka aku??? Nyamai ga urang ti udah megai pangkat "Tuansipol" ngambi bala diri ngajar maya tu.

Pagi siti nyau meh aku ngasakka honda cup ti nyau ka teberingkah sepering nya mansang nuju SMK Pending lalu ngisi serta ngambi semua pom ti dikena minta masuk nyadi temporary teacher deh. Apoooo lalu di agihka ngajar Ilmu Alam, English enggau PE mula mula masuk nyadi pengajar temporary. Sebedau mulaika diri lalu dipesan urang nyendiaka diri belatih bemain bul enggau team pengajar sekula laban deka berebutka mangkuk PSKPP Bahagian Pertama!! Hmmmmm..akai daiii sigi nadai jam bejegau sebelah pasar agi meh tu.

Kelalu deka bemain bakatu kelia....lalu ngerampit..

Nadai meh pengawa bukai maya udah pukul lapan, pukul semilan malam laban ti nadai pengawa sekali. Bala anak mensia mit besai sigi ngemenuhka jalai deh kelia. Bala kami apoooo enda ulih rintai nama bala selalu duduk ba pun jalai semak parit lalu bekeretuk meh nya nebah gitar. Nya meh tengahmalam nyau enda berasai jampat datai deh. Suah ari ti enda meh bala kami tu suba diperak urang! Pama Polis bisi dikangauka urang nyau bekedebar mensia ngelarika diri. Nyin bala keda lari ke madang nanas. Bisi meh nya nyau ke belakang lesap ba sebelah kampung madang kemiding<--tempat siti ti nyadi penuduk MJC, Batu Kawa diatu! Nyau basah mega bala keda laban menua nya ga kerapa deh!!

Tu meh buah nyadi ketegal pemalat bala mensia bemain gitar tisi jalai kelia..boleh tahan magang ga bala menyadi.

Tu menyadi enggau bala bemain ba Waterfront 2006!!

Ari Tanjung Lobang pulai ke Kuching....

"Kemaya meh ulih datai baru ngindik, nujah nengah tengahlaman sekula ti udah alai begagai nyau empat taun enggai tu ila?" ku tudah ga nanya diri maya ti ngepai pintu penama jalai besai terebai nepan MAS pulai ke menua ti benama Kuching. Nyau kin kitu meh bala anak runding ngiga tawing ti tau enggau begulai ngelantangka diri. Melelat nyau ngenang penyayau tekang mau ti tinggal, tang enda ngawa laban ulih betemu baru dudi hari ti deka datai tu ila. Nyau kepuas puas iya merening perenching pemajik gamal sida endu pengawas MAS terengkah ga bala kami di Lapangan Terbang Kuching.

Akai dai...berasai puang laban ti nyau beserara enggau kaling serambau sekula. Siku nyau ga mulaika diri ngagai Kampung Pueh, Sematan...siku nyau ke Kampung Taie, Serian lalu siku lanjurka Tebekang. "Kelak jumpa at my place," ku aku nelai bala. Tudah aku lalu ditabanka menyadi lalu di bai iya duduk...danggg enda ingat nama penama tempat alai belelak ba simpang besentang enggau rumah RTM, Kuching nya. Udah belelak lalu dibai niki ba Badruddin, tempat penyaga pengelikun mensia menua Malaysia, laban bisi utai di ambi. Datai di Batu Kawa lalu mukul talipaun madahka kaban aku siku ti diau ba Kampung Muda Hashim semak jematan besai di Satok din madahka diri udah datai. Ahhhh nama agi deh..sebut aja nama All Joy dia meh alai bala betemu. Nyau kepuas puas bejalai kekalat nadai penunga sebelah Elektra pulai ga ke rumah...

Lemai baru datai lalu di bai bala bemain ba padang Perumahan ti lalu bedau tumbuh rumput, nyau baka sepan pelangkan jani aduhhhhhh..nasit udah mayuh bala dikelala udah teleba enggau begulai alai tak nyamai ati mimit begulai enggau bala bukai bemain. Bemain naka pengeka ga tudah aku tu kelia!!! Bebitau bebayau meh pama udah petang jauh lemai. Mayuh meh utai ti enda menyana, enda menuku ditemu. "Give me a month," ku aku madahka Ambrose enggau Patrick. "Lelubah meh B," ku seduai iya. Tanjung Lobang tak seruran di kenang ari belakang belama.

Betemu Enggau Seniors

Terima kasih nuju seduai ti ampit enggau betemu, and most of all terima kasih for the MH(Malaysian hospitality)...your senior Idris J and his crew say lah. Kambin tuai siku tu(GT) meri besai terima kasih. Pagila lusa aku nyambung jalai batang pengidup udah Tanjung Lobang thereafter lah. Pogykat...thanks. Henry..dah mansutka diri ari "blackhole of Kenari". Terima kasih tuai. Ngajihka belimpah betuah lalu ulih serta tau betemu baru enda lama agi meh.

Meri Selamat Nyambut Bulan Lima

Tabi basa semua bala kaban serta enggau bala pemacha bukai mega.

Enggau pemansut kali ketiga sekali tu, mai ati tebuka ati gaga meh tudah aki Gerubituai ngerebakka lambar layar berengkah belayar neresa dunya ti bedau ditengah, ditujah. Enggau naka pengaga meh tu mai bala betemu baru mulaika pengingat enggau tangkai jaku bansa.....oooooo hhaaaa nyau tebuka meh pintu dunya aki gerubi tajapan injis nyau betegar hahahaa...ahhh. Meri besai terima kasih nuju bala ti sempat ninggalka pesan. Apoooo udah bepilih pia bala kita akih HJ? Ahh nuan deh? Bisi enggau ngeruh ai? Bala ditu agi betegangka batang rekung tu nya...ahhh masam manis meh keda utai deh kaban. OOOhhhaaaaa

Pengaga Udah Beperesa..

Nyau bebantaika arak tuak enggau beer bala mensia laban gagaka diri udah tembu peresa kali kedua. Bala ti baka ti enda ari kelia pan nyau meh nemu nuntum rekau rekau munyi kangau manjung nyebut one go langgak. Bala sekeda nyau beteguir meradakka nyawa belagu enjit enjit semut. Ukai nama, laban pengaga diri meh nya. Pas enggau pil pan udah enda masuk pikir agi deh laban tu meh maya bala meri tabi basa kali penudi iya enggau pangan diri. Pagila lusa entah kemaya ulih betemu baru, saum padang alai begulai betendang. Pagila lusa ukai dikumbai anak sekula tang anak kuli menua. Bisi sekeda nya deka nyadi pengajar laban engka rindu ditabi nembiak rebak baru good morning sir selamat pagi puan. Bisi sekeda nya ahhh deka nuntum minyak ba Lutong din. Bisi ga bala deka nyadi menteri megai menua. Aki gerubi semina andal ati laban ukai semina udah abis peresa tang mulaika diri ke menua ngasai peninduk diri empu. Ngelama lama tu ukai bisi jenak deh tinduk laban dia lelak dia ga melukuk, pemedis siku nembiak ti dibuai ari buding sampai umur. Pengaga ati nyau ga betukar ganti maya merening mua endu RD ti tinggal setaun. Enda ngawa ku jaku deh. Tu meh maya bala kami kelas 1983 melengka ngejang belayar ngenang ninggalka Tanjung Lobang. Bekau timbau semina tak pulai nyadi kenang; nyadi pengingat enda pungkang sida dara bujang.

Enti kita nembiak rebak baru ampit macha kenang cherita aki gerubi tu tau ga kita ngusung bansal alai berintai baris ninga licha bala pengajar sekali seminggu. Tau kerebakka papan pentas beranyam pisit alit nadai betulang nya alai kita tau nemu pemayuh utai diselalaika dia. Din iya ku bala, ba assembly hall, alai kami ngelalaika bekau penatau bekal pemanchal. Niki ke sadau tau ga seliak tama niki katas...bisi pintu penama ti mit dia..alai kami ngelalaika insap, butul, enggau utai bukai mega...engka agi laluh 7-up enggau coca cola ti ditabanka bala ari koperasi. Enti kita nurun nyala ari sepiak tebiang belakang tungaka tasik alai padang tumbuh lalang, enti nasit manah, tau bulih luching sekula ti digaringka tiga iku nembiak junior aki gerubi kelia. Hahahah kada enda nyau betegar meretah besapar laban pemasin ai tasik china selatan! Diatu engka nyamai begigaka utai ti diselalaika kami kelia laban akih P. Ngau ti bulih kuntrik begagaka sekula Tanjung Lobang. Save that pokok coconut for me bakih!!

Pengaga udah beperesa pan nyau ditangkanka penyinu laban tu meh maya kami sebala bekepai goodbye see you later maybe next year enti nasit manah. "Kemaya meh kitai tau betemu baru neh sanu," ku serbana anak mensia. Bala ti bisi indai dom pan nyau bekangau ngumbai pengerindu putus tengah jalai laban deka beserara enda lama or forever and ever amen! Tang enti nitihka seranyat kuing pendiau bala ti udah, sigi naka pemayuh bala sida ti ampit bepangan maya sekula tu jadi enggau pangan diri. Nya lapa deh...nyau belunsin lunsin anak ..anak chuit ahhh..hahahaaa. Yeap buddy..endang mayuh ga nirika rumahtangga meruan idup begulai sampaika kemaya hari tu. Tu meh siti ari pemayuh jalai pengidup anak sekula Tanjung Lobang. Enggi diri, ahhhh udah bisi one way ticket to Kuching!! Nadai beleman deh maya udah deka pulai..bendar ngitung minit nyau sampai enda tepejamka mata. Time to say sayonara ngagai kubur jipun ba Tanjung Lobang. Time to say bye bye pengidup sekula hahahaa..maya alai kami merekatka bala mega..good luck and may the duck betelu memayuh!! Maya bala mensia nundaka jaku pesan terminator Arnold Sawanaga "I'll be back". Pengajar bukai ti tinggal pan naka pengaga meda bala kami sekeda nadai ayan kemayang agi. Jangka aku meh, kada enda begendang raya bala sida iya.

Tu meh maya meri besai terima kasih ngagai semua pengajar ti ampit ngiring bala kami kelas 1983. Enti nadai kita, kami enda nyadi kami and whom ever maybe neh. Terima kasih Cikgu Tuansipol Adi Badiozaman Tuah, William Laing, Bedui Uni, Jamit Ajok, Lau Ung Ngie, Mr. Jee Kah Jin, Miss Sarina Sauni, Miss Evelyn Ritikos, Ms Sanee Jaid Parker, No heart feeling ya Mr. Ting laban I didn't break your window!!!, Mr. Poh, David Ford, Awalludin Kassim, Naimuddin, Balang Buayeh, Affendi Morni, enggau kita bukai mega..one section tu lagi sigi ditujuka kita pengajar deh.

Buchur Nyuruh Nyamai..?????

"Ukai nyamai deka nyamai; bukan senang mau senang pok," kesuh seput bala sekeda meh tu betelai enggau pangan diri ngenang diri nyau ngulang baru! Semua utai ti udah dipelajarka dua taun tu udah deka dipelajarka baru dalam jangka dua minggu?!? Sapa kita anak mensia berani nachah ngerenchah taun lapan puluh tiga tau meh mulaika diri ngagai taun tu, enti nyema ulih ditikalka ngambika sama nguji ngasai nyepi buah tamang mirah chinang inang mansau enda dipanduk! Lapan ari sepuluh bala kami tu suba nyau betungkuh lumuh, nyau kasak kasak baka ukai labuh anak ngerumban jam dua minggu, empatbelas hari, tiga ratus tiga puluh enam jam tulak dua tiga jam sari alai endur belelak, empat lima jam semalam alai endur mejamka mata!!! Tinggal berapa? We do the math! Dua ari sepuluh tu tadi sigi enda tentu deh laban ti nadai daya agi, untak nyau begirau engkurak ransi. Mangkin dipajakka seleka dua sejarah dunya Julius Ceasar Roman Empire mangkin mayuh agi mantul ngechul meruap lilih siuh ari kerubung pala. Nyadi tudah aki gerubi ngarika dua ari sepuluh. Kin kitu ngiga asai ngichaka utai dipelajarka ulih tama. Lelak belajar ngimbit indu dara...barang sapa ti semak dia meh berap laban ti ngiga asai! Jaku buchur tu ba bala kami naka pemesai reti laban benda kebuk belubang pesuk ukai ulih tampal bakanya aja. Bala kami ti beperesa STPM 1983 , maju enggau enda, would be judged by the outcome peresa tu anybody saw fit forever deh. Ari runding sekali nyeling enggi aki gerubi, pemanah enggau penyai utai bakatu endang mengarai naka pemayuh.

Ngemediska nembiak....
Pengawa bakatu ngemediska nembiak ti beperesa. Bula kitai madah enti ngumbai nyamai ngulang pengawa, ngulang belajarka utai ti udah dipelajarka dalam angka kira jam dua tiga minggu. Indah nembiak ti bekikih bulu betis, munuh diri belajar sema ku jaku tau enda pas. Dua tiga minggu???
Baka bala kami tu suba, udah ga nyadi perujik pilut orang nyau ga kena tinggang penusah buchur tu. Ngayahka nembiak amai amai..nya lapa deh sumpah pan nyau enda berasai ngenataika.

Masau jam enggau belanja...
Kati ku enda masau jam enggau belanja utai bakatu? Bala kami kendua ti diau di buding, ukai enda tau enda makai tengahari, lemai enggau ngirup pagi deh? Enda ibuh ga enti baka aki gerubi laban ti udah kena suspended dibuai ari buding for life..tang ukai belanja si culprit ti ngasuh utai buchur bakanya dikena ngintu mela diri. Enti sida iya meri belanja enda ga ngawa..tiap hari tau meh buchur awakka nyepi asai nupi bala nembiak. Jam pengajar tebasau laban enggai enggai pan sida tu tadi ngetanka diri ba sekula dua tiga minggu nitihka nembiak laban bah..sapa ti nyaga sekula deh..sapa ti ngatur ngemujurka pengawa beperesa deh? Dua tiga minggu tu, enti udah bisi bini anak, bisi amai alai endur ngintu pengawa diri empu begulai enggau bini anak sida. Sida tukang masak deh? Api ai ti dikena maya ngulang tu deh? Enti dikalihka ngagai mata duit berapa penyampau ungkus utai bakatu. Tu jangka aku, the least they worried about asai bala sida iya nyamai..lapa enda nyamai enti utai buchur enda temu kitai, enda pia? Tu utai udah enda ulih dipelalaika? masau belanja apai indai mega laban bala sekeda udah bebelika tiket bilun nagaka diri terebai mulaika diri ke menua udah tembu beperesa. Nyau ga kuang kuit ngatur tiket diri. Ukai ulih bedarat enti mulaika diri ke Kuching?!!! Ukai nya baka kediatu bisi jalai alai bas, kerita , lori kekesur mansa tetiap jam!!

Tau dikarapka nya dudi hari ila...????
Enti HSC engka ga agi tau dikarapka laban nadai kala buchur dipegai Cambridge. STPM keterubah iya dipegai sapa lalu buchur? Nama penyadi peresa bukai dudi hari ila seagi agi iya dipegai sida tu deh? Ku jaku nyamai meh udah dipegai kitai empu laban nyamai datur enda pia? Opppssssiieee we tend to forget ku apai saloi deh...enti bisi kaban belayan, anak or maybe kupi O kusung..sigi amai amai special..darn extra special interest deka ngelebuhka bala diri, enda pia? Damn it mannn..I would do the same for my folks if I could get my little fingers dirty..sama mensia enda pia? "Apuuuu nyau ga SPM, SRP dudi hari ila," ku bala kami bekenangka tu suba..mati kitai. Enti temu baik ga agi, ulih kitai ngulang..enti enda deh? Enda ka kitai tak mati mumu engkelung meleku dikelakar bakanya! Muntat bakani tau meh pas enti bisi orang ari dalam nyin ngerami enggau ai penchelap chap nipu banggar ngelakar.

The bottom line ku kitai meh, naka penyayau peresa ti terubah iya laban utai dipelajarka pansut memagang, peneka milih nadai penanggul sekali. Kali kedua??? Nyin aya pawi duduk rerungguk ba pulau kelapa mansau naka penyauh!!!Mayuh mega runding ti melelat ngambat dati ngusung ngenang peresa buchur, enda ulih rintai tisi jalai!

STPM 1983...Enda Mukai Mukai....

Nitihka padah orang ti pandai serta nemu mimit maya tu, peresa HSC(Higher School Certificate) tu dikemataka, dikemendarka serta dikeluarka Cambridge University. Laban menua nyau deka bekalih betukar, peresa perintah pan enda mega dikelaungka lalu ditukar ari HSC ngagai STPM. Nama udah nyelai, chara nyebut udah mega nyelai..oooohhh ku kami Higher School Certificate ngagai Sijil Tinggi Persekolahan Malaysia..apooooo lain amai ga didinga tajapan dikumbai orang 'sama sebaka'. Nyauh ni pengamai iya kami, laban ti agi nembiak..baru enchelak ringgak ringgak enda nemu utai enchukak, enda mega nemu laban ti baru nyepi isi jelu menua diri bakatu. STPM tu mega, kenu ku bala mensia, dikemendarka, dikemataka lalu dikeluarka Kunsil Beperesa Perintah menua Malaysia(Malaysian Examnination Council) empu. Dini deh bala kami sempat meresa serta meratika penyelai enggau penyama peresa perintah dua iti tu!

Beperesa perintah taun 1983 tu mayuh penumbuh deh bala. Bala sekeda ti udah abis peresa akai daii...nama agi dehhh..nyau betuntumka butul stout butul Carlsberg enggau Dry Gin ti asai ai bungai dikusuk nya. Bala ti agi beperesa nya tadi endang beremasin meh ngulihka diri ngichaka seleka dua penemu dalam pelajar ulih lekat di bai ngusung bilik beperesa. Enda mukai mukai ga penumbuh peresa perintah STPM taun tu..keterubah iya berita pansut ngirauka ati nembiak sekula. Nyau kelama lama iya ngira diri bakani deka nyendiaka diri beperesa laban nadai orang bukai ti udah alai betanya! Pengajar pan enda tentu nemu bakani ku nyamah STPM tu. Bahlah..pengirau ati nyadi pengamai laban berita ti ditaburka pengajar enda manah...STPM 1983 bocor!!! pesuk..belubang jarang ...Akai daiii bisi bala nyau ringat..bisi sekeda nya ransi tang ransi ukai jaku enti kitai deka nyimpulka ulah mensia udah ninga berita bakatu. Bisi nya nyau kimut kimut mulut nyumpah utai datai ba perut indai! Bala ti udah begawai nagaka diri udah tembu deka pulai tu tadi nyau betendangka baldi ti dikena mandi! Irau kedua kali meh bala mensia digaga bakanya. Salah sapa? Enda meh nemu..tang tunjuk lelaki aku nunjukka sida ti ngemataka peresa tu di seberai nyin ari kelia sampaika diatu deh.

Tu meh penusah kitai enti utai dipegai bala mensia ti bisi self-interest, nguntungka diri empu enggau diri sebilik ba nama nama pengawa! Keterubah iya lalu bocor!!! Kati ku baka deh? Ulih dikarapka nya dudi hari ila? Nadai kala bocor HSC ti dipegai Cambridge University sebedau tu kelia. Engka bala menyadi sida, kaban sida, anak sida bisi enggau bala kami beperesa STPM kini...besambung....